KOVALIMA, 11 Abríl 2025 (TATOLI) – Ministériu Dezenvolvimentu Rurál no Abitasaun Komunitária (MDRHK, sigla portugés) apela ba grupu 46 hetan apoiu fundu nune’e utiliza tuir nia dalan hodi bele atinji meta polítika husi Governu.
“Governu uza fundu transferénsia ajuda grupu sira atu implementa programa reabilitalizasaun komunitária foku ba setór produtivu sira apoiu ba grupu uza tuir nia dalan atu hetan meta tuir polítika Ministériu”, Xefi departamentu promosaun no kapasitasaun MDRHK, Tobias Moniz Vicente Smith dehan ba TATOLI, iha Tabakolot, ohin.
Hafoin fó apoiu orsamentu, Governu kapasita Grupu 46 no estrutura SDA sira durante loron tolu ho intensaun atu transforma mentalidade no kbiit grupu sira bele moris independete; labele dependénsia ba produtu loja sira, tanba sira iha ona koñesementu naton atu jere rasik atividade iha setór produtivu.
“Politíka Governu apoiu fundu parte ida atu muda mentalidade no hasa’e produsaun oinsá ita bele redús importasaun husi rai li’ur entaun presiza utiliza didi’ak orsamentu ne’ebé Governu fó apoiu ba grupu sira tuir nia dalan, planu no objetivu nune’e hodi hala’o atividade iha setór produtivu sira”, nia informa.
Kada tinan aprova OJE, nia dehan, rona de’it informasaun husi televizaun maibé polítika IX Konstituisionál instala Ministériu dezenvolvimentu rurál no abitasaun komunitária ho nia polítika katak agrikultura mak sai na’in ba OJE.
Nia kompara, Governu anterior mós halo transferénsia, maibé diferénsia ho Ministériu dezenvolvimentu rurál no abitasaun komunitária nia programa tanba fasilitadór iha terenu atu kontrola subvensaun públiku iha aldeia nia konta, labele lakon tenke fila ba konta aldeia.
Ho nune’e ba futuru aldeia ne’ebé mak seidauk hetan apoiu bele hetan , tanba kada grupu ida bele hetan apoiu orsamentu hamutuk rihun $ 40 to’o rihun $ 50 hodi finansia sira-nia atividade iha setór importante sira.
Reprezentante Prezidente Autoridade Munisípiu (PAM), Kovalima, Filomeno Cardoso, hato’o agradesimentu ba Ministériu ne’e tanba fó apoiu orsamentu ba grupu 46 iha aldeia 10.
“Ha’u hanoin ita fahe ona esperiénsia ba malu oinsá buka moris liuhusi fundu ne’ebé fó apoiu husi Ministériu Dezenvolvimentu rurál abitasaun komunitáriu atu buka osan liuhusi negósiu nune’e uza osan tuir dalan”, nia fó hanoin.
Notísia relevante:Aldeia 10 iha Kovalima sai alvu implementa programa revitalizasaun komunitária
Jornalista: Celestina Teles
Editór: Rafael Ximenes de A Belo
