OEKUSI, 11 Abríl 2025 (TATOLI)– Komisáriu Autoridade Aduaneira (AA) Alfándega, Joanico Pinto, rekomenda ba Governu atu konstrui infraestrutura hodi fasilita prosesu servisu husi Migrasaun no Quarentena iha postu integradu Oésilo.
Komisáriu AA Alfándega hato’o nia rekomendasaun liuhusi diskursu ofisiál iha ámbitu seremónia reativasaun postu integradu Oésilo ho Pos Lintas Batas Negara (PLBN) Napan, kinta ne’e.
Tuir nia, kualkér atendimentu públiku ba servisu CIQ tuir padraun internasionál tenke trata ema ho sasan dignu, entaun tenke iha kondisaun bele apoia servisu sira-ne’e tanba nesesidade ho reativasaun postu integradu Oesilo, tuir obsevasaun katak haree ajusta ita-nia aan tuir parte sorin (Indonézia) sira-nian kondisaun priénxe no tuir duni padraun internasionál.
Notísia relevante:Timor-Leste no Indonézia reativa postu integradu terrestre iha Oésilo no PLBN Napan
Postu integradu sei akumula parsériu barak, maibé prosesu servisu importante liu mak CIQ ne’e, Cumtoms haree liu ba sasan, migrasaun haree ba ema tama no sai no Quarentena haree ba animál no ai-horis ne’ebé tama no sai.
“Ami ne’e utilizadór de’it, maibé ami prontu fó atendimentu maibé ba oin, hakarak ka lakohi tenke instala duni infraestrutura iha ne’e ho padraun ida-ne’ebé di’ak, nune’e bele fó atendimentu ida di’ak lais dignu no justu liu ba sidadaun hotu ne’ebe hakarak uza fronteira ne’e,” nia hateten.
Eskritóriu daudaun ne’e ejiste do’ok liuhusi fronteira oin enkuantu atendimentu tenke mai oin iha liña frente, tanba ne’e mak jestaun integradu ho koordenadu ona ho servisu CIQ, sei halo servisu iha fatin sira-ne’e, temporariamente tenke instala kondisaun ruma iha liña oin atu-bele fasilita movimentu tama no sai.
“Ne’e la’ós kondisaun laiha, ami labele halo atendimentu, maibé ita lansa ona ita tenke halo ona atendimentu, biar nune’e ita tenke rekoñese atende ho kondisaun ida mínimu liu entaun autoridade sira liuliu Governu tenke iha obrigasaun atu fó kondisaun ba pesoál destakadu iha área fronteira,” nia rekomenda
Notísia relevante:RAEOA lansa postu integradu Oésilo hodi hasa’e kresimentu ekonomia fronteira
Hataan ba rekomendasaun ne’e, Prezidente Autoridade RAEOA, Rogério Tiago de Fátima Lobato, sei koordena ho Primeiru-Ministru, nune’e bele konstrui infraestrutura, tanba fronteira tenke hatuir dignidade Timor-Leste ho loloos.
“Prioridade mak ne’e Autoridade sei halo uma ida di’ak, atu fasilita servisu migrasaun no alfandega, tanba ne’e dignidade Estadu Timor-Leste nian, ita labele simu deit ema iha ai-hun sira, ne’ebé ha’u sei deskute ho Primeiru-Ministru tanba nia mak tutela ba RAEOA,” nia promete.
Alende ne’e, nia sei orienta ho parte tékniku sira husi Diresaun Rejionál Infraestrutura (DRI) atu prepara nia dezeñu BoQ hodi konsulta ho Ajénsia Nasionál Dezenvolvimentu (ADN) atu aprezenta ba Primeiru-Ministru hodi deside.
“Ha’u sei husu ba DRI, halo proposta ida kona-ba saida de’it mak sei halo iha ne’e, sei aprezenta mai atu ko’alia ho ADN no Ministéru-Interiór, ita tenke halo uma di’ak ida, tanba iha sorin sira-nian diferente maka’as ho ita-nian, entaun ita tenke halo mós atende ema ho dignidade,” nia katak.
Notísia relevante:RAEOA aloka rihun $510-resin harii postu integradu Oésilo
Jornalista: Abílio Elo Nini
Editór: Florencio Miranda Ximenes
