DILI, 11 Abríl 2025 (TATOLI) – Instalasaun semáforu modernu haat iha kapitál husi PT. Javis Teknologi Albarokah nia progresu atinje ona 50% no daudaun funsiona ona.
Semáforu sira ne’e instala iha área Timor Plaza oin, Palásiu Prezidensiál, Kolmera no iha Ministériu Justisa nia oin, iha Kaikoli.
Jerente PT. Javis Teknologi Albarokah, Hendrit, esplika katak tanba dispozitivu semáforu sira ne’e ativu ona maka daudaun empreza foka fali ba intalasaun ekipamentu teknolojia informátika (IT, sigla inglés) no Closed-circuit television (CCTV) no CCTV room iha Diresaun Nasionál Transporte Terrestre (DNTT).
Iha sorin seluk, Xefe Departamentu Sekretáriu Apoiu Tékniku Administrasaun iha (DNTT), Nelson Sequeira, hateten sira-nia parte nafatn akompaña serbisu empreza nian iha terrenu no nota katak serbisu kontinua la’o no DNTT mós planeia sei moderniza hotu semáforu iha Dili, iha tinan ne’e.
Totál semáforu ne’ebé instala iha kapitál hamutuk 10, haat mak moderniza ona no neen seluk seidauk.
“Ida-ne’e planu ona, maibé ninia orsamentu boot, sei tama iha Konsellu Administrasaun Fundu Infraestrutura (KAFI) mak deside hafoin implementa”, katak.
Lembra katak, iha 2024, Ministériu Transporte no Komunikasaun (MTK) kontrata PT Javis Teknologi Albarokah halo instalasaun ba semáforu modernu foun haat ho montante $748.557,28, no tuir planu sei finaliza iha fulan ne’e.
Notísia relevante: https://tatoli.tl/2025/01/21/empreza-javis-teknologi-hahu-serbisu-ba-instalasaun-semaforu-modernu/
Jornalista: Arminda Fonseca
Editora: Maria Auxiliadora
