KOVALIMA, 11 Abríl 2025 (TATOLI) – Konsellu Munisipál Kombatente Libertasaun Nasonál (CMCLN-sigla portugés) , Kovalima, daudaun ne’e rejista ona veteranu no martir nia oan sira hamutuk na’in-85 mak submete ona sira-nia dokumentu hodi asesu ba vaga bolsa estudu.
“Atu asesu vaga bolsa estudu husi (CMCLN) iha Kovalima fó oportunidade ba veteranu no martir nia oan durante loron 30 ne’ebé hahú husi 14 to’o 22 Abríl. Daudaun ne’e kandidatu alunu 85 mak submete ona sira-nia dokumentu”, Sekretáriu CMCLN Kovalima, Joaquim Barros “Sikatlet”, relata dadus ne’e ba TATOLI , iha Tabakolot, ohin.
Alunu 85 ne’ebé submete sira-nia dokumentu ne’e fahe ba bolsa estudu nívél ensinu superiór rai laran hamutuk 48, ensinu superiór rai liur na’in-ida, ensinu sekundáriu hamutuk 21, ensinu báziku primeiru siklu na’in-tolu, segundu no terseiru siklu na’in-12.
Notísia relevante:Governu loke vaga bolsa estudu 100 iha Kovalima
Nia esplika katak, CMCLN Kovalima nafatin fó oportunidade ba veteranu no martir nia oan sira ne’ebé mak hakarak asesu bolsa estudu, tanba loron ikus simu dokumentu iha loron 22 Abríl.
Kona-ba anúnsiu rezultadu, Sekretáriu CMCLN Kovalima, Joaquim Barros “Sikatlet”, konfirma, Ministériu mak bele fó sai maibé bazeia ba esperénsia, rezultadu lista ba veteranu no martir nia oan sira ne’ebé elijível atu asesu vaga bolsa estudu, fó sai iha Setembru la’e Outobru.
Atribuisaun bolsa estudu ba kombatente no martír sira-nia oan ema ne’ebé bele husu atu hetan bolsa estudu mak hanesan oan husi kombatente libertasaun nasionál ne’ebé mate, tanba partisipasaun iha luta ba libertasaun nasionál ne’ebé editadu.
Bolsa estudu fó oportunidade martir no veteranu nia-oan sira ne’ebé kada munisípiu iha kandidatura na’in-100 kompostu husi bolsa estudu primeiru siklu ensinu báziku ema na’in-lima, bolsa estudu segundu no terseiru siklu ensinu báziku 15, bolsa estudu ensinu sekundáriu 25, bolsa estudu ensinu superiór rai laran 50 no ensinu superiór rai li’ur na’in-lima.
Jornalista: Celestina Teles
Editór: Rafael Ximenes de A. Belo
