VIKEKE, 12 Abríl 2025 (TATOLI)—Abitante Suku Maluru, Postu Administrativu Vikeke Vila, Munisípiu Vikeke, husu Governu no Timor GAP,EP klarifika Planta Líkidu Naturál Gás (LNG-sigla inglés) ba povu afetadu Beasu.
Abitante Suku Maluru, Moises Claver Pinto, haktuir iha tinan 2023 komunidade Maluru oferese rai ektare 577 ba Governu anteriór hodi harii Planta LNG iha área Beasu, maibé to’o agora komunidade la rona tiha ona ninia prosesu to’o ona iha-ne’ebé.
“Ami hein hela Governu no Timor GAP ninia klarifikasaun ba ami, atu ami bele hatene. Se tau fali ona iha Natarbora la buat ida, maibé ami presiza husu parte relevante mai hato’o bá ami, tanba agora povu Maluru túr ho dúvida hela, katak kadoras mai Beasu ka lae. Se la mai aprezenta fali bá ami atu ami bele hadi’a ami-nia uma no dezenvolvimentu sira seluk iha ami-nia suku,” Moises ba jornalista sira, iha Suku Maluru, sábadu ne’e.
Moises dehan, durante tinan haat ba kotuk Governu anteriór indika área Beasu (Maluru) sai fatin protejida ba Planta LNG nune’e populasaun sira labele halo sira-nia uma no infraestrutura la tama iha Suku Maluru.
“Durante ne’e ami nunku simu programa dezenvolvimentu ruma tama iha ami-nia suku, tanba Governu anteriór mak pendente tiha, basá área Beasu sai hanesan área protejida ba Planta LNG,” nia hato’o.
Notísia relevante : https://tatoli.tl/2023/02/02/governu-publika-dadus-rai-no-propriedade-ba-projetu-planta-lng-beaco/
Entretantu, Xefe Suku Maluru, Bendito Soares, reforsa katak programa dezenvolvimentu ba Suku Maluru hahú la tama dezde tinan 2021, relasiona ho planu estabelese Planta LNG iha-ne’ebá.
“Foin lalais ita akompaña liuhusi mídia, XI Governu Konstitusionál lansa fali Planta LNG iha Natarbora (Manatutu). Maski planta LNG muda ona ba fatin seluk no ne’e laiha problema maibé importante Governu tenke mai halo klarifikasaun ruma ba ami-nia komunidade atu sira bele hatene,” nia tenik.
Hatán ba preokupasaun ne’e, Prezidente Autoridade Munisipál Vikeke, Francisco Cruz Simões de Gonzaga Soares, rekoñese komunidade área Beasu hasoru esperiénsia moruk ba planu Planta LNG.
“Ba komunidade nia preokupasaun sira-ne’e, ha’u sei konvida Timor GAP no Autoridade Nasionál Petróliu (ANP) atu esplika ba ita-boot sira (Maluru). Karik sira la bá Beasu ka Maluru, loron ida ha’u sei bá Beasu hodi klarifika ba ita-nia komunidade kona-ba Planta LNG. Nune’e, ha’u husu komunidade tenke ho fuan malirin,” nia esklarese.
Jornalista: Vitorino Lopes da Costa
Editór: Xisto Freitas da Piedade
