VIKEKE, 12 Abríl 2025 (TATOLI)—Xefe Suku Maluru, Postu Administrativu Vikeke Vila, Munisípiu Vikeke, Bendito Soares, husu Governu liuhusi Ministériu Obra Públika (MOP) atu tau-matan ba mota Beasu hodi kria moru protensaun no konstrui ponte Beasu hodi fasilita movimentu transporte no ema.
“Durante iha tempu udan mota Beasu sai ameasa ba ami-nia komunidade nia uma, inklui ponte Beasu ne’ebé kotu iha tinan 2016 ne’e, kuandu mota tun la’ós difikulta de’it komunidade Maluru, maibé difikulta mós movimentu sira husi Uatukarbau no Uatulari, iha-ne’ebé liu labele no tenke hein kle’ur to’o mota menus foin ultrapasa,” Bendito hateten ba TATOLI, iha Suku Maluru, sábadu ne’e.
Autoridade Maluru ne’e haktuir, problema ne’e autoridade aprezenta beibeik ba MOP, maibé to’o ohin-loron seidauk rezolve preokupasaun referida.
“Ami aprezenta beibeik ba Obra Públika Munisípiu Vikeke, maibé sira dehan ne’e reponsabilidade husi MOP nasionál. Tan ne’e mak to’o agora seidauk responde ami-nia preokupasaun,” nia hato’o.
Nia mós hateten, foin lalais ne’e autoridade suku aprezenta ona preokupasaun ne’e ba Ministru Obra Públika, maibé seidauk iha resposta to’o ohin-loron.
Notísia relevante: https://tatoli.tl/2022/06/30/uma-86-iha-beaco-afetadu-inundasaun/
Hatán ba preokupasaun ne’e, Diretór Serbisu Obra Públika Munisípiu Vikeke, Casildo Gomes, katak kona-ba preokupasaun autoridade Suku Maluru nian, Serbisu Obra Públika Vikeke tempu badak sei aprezenta proposta ba Institutu Jestaun Ekipamentu no Apoiu Dezenvolvimentu Infraestutura, Institutu Públiku (IGEDI,I.P-sigla portugés) hodi normaliza uluk sedimentasaun iha mota referida.
“Kona-ba ita-nia autoridade Suku Maluru nia preokupasaun ba mota Beasu, ami sei aprezenta proposta ba IGEADI hodi mai halo normaliza uluk lai. Depois mak ita haree tan konstrusaun permanente,” nia afirma.
Rekorda fali katak iha tinan tinan 2022 akontese udan-boot bee sa’e rezulta komunidade uma-kain hamutuk 86 mak sai afetadu iha área Beasu.
Jornalista: Vitorino Lopes da Costa
Editór: Xisto Freitas da Piedade
