DILI, 13 Abríl 2025 (TATOLI)—Arsebispu Metropolitana Dioseze Dili, Dom Virgílio Kardeál do Carmo da Silva, husu sarani sira iha selebrasaun Semana Santa ida-ne’e atu haraik-aan, tau konfiansa no obedese ba Maromak ho fuan no laran la’ós tuir isin nia hakarak.
“Ohin ita la’o hamutuk ho Jezus tama bá Jeruzalén, hanesan judeu sira hananu haklalak, lori ramus-tahan haksolok. Maibé, tama tiha iha Uma-kreda laran ita rona Jezus nia omiliasaun,” Arsebispu dehan liuhusi nia omília iha misa Domingu Ramus, iha Igreja Katedrál, Vila-Verde, Dili.
Kardeál haktuir Jezus mós haksolok haree oinsá povu Izrael sira ki’ak maibé rekoñese Nia nu’udár liurai, Nia nu’udár Mesias, maibé ema Farizeu sira-ne’ebé haree ne’e, haruka sira nonook, maibé Jezus dehan, sé ema sira-ne’e mak nonook, fatuk mak sei hakilar.
“Ne’e signifika haraik-aan. Haraik-aan la signifika atu nega realidade. Tanba Jezus ne’e liurai duni no tanba Jezus Mesias duni,” nia esplika.
Líder Igreja Katólika ne’e hateten, ohin mós bainhira tama iha Jeruzalén, Jezus hatudu dalan ida-ne’e mai sarani, basá iha akontesimentu sira hanesan ne’e, ida-ne’ebé joga papél ne’ebé importante liu iha-ne’e, mak santanas uza ninia maneira atu hetan vitória, hanoin oinsá mak atu sai susesu domina iha tentasaun.
“Bainhira santanas hatudu ninia dalan liuhusi triunfu susesu, maibé Jezus hatudu nia dalan liuhusi haraik-aan no Jezus harahun tiha ona hahalok triunfalizmu ida-ne’e ho ninia paisaun,” Bispu hatutan.
Amu Bispu dehan, hahú husi uma-laran haksolok, ksolok festa ninian. Hafoin rona, oinsá ema hakilar hahí hasoru Jezus, ida-ne’e mak bele dehan katak mistériu duplu akompaña idak-idak tama ba Semana Santa.
“Momentu rua ne’ebé karateriza selebrasaun ida-ne’e. Primeiru mak ita foin hahú ho prosesaun lori ramus iha ita-nia liman, no daruak ninian, ita rona Jezus nia paisaun, nia terus no nia mate,” Don Virígilio subliña.
Nia esplika, husi ne’e Jezus hakarak hatudu mai kriatura (ema) oinsá nia hasoru situasaun difísil, oinsá nia hasoru tentasaun ne’ebé forte, maibé buat ida-ne’ebé ema haree katak Jezus buka kuida mantein ninia fiar.
“Kuida nia fuan atu hakmatek nafatin, atu iha nia fuan iha pás. Nia buka atu iha situasaun hirak-ne’e hotu, Nia buka atu lahadook-aan husi Maromak, la dezliga nia-aan husi Maromak, maibé iha situasaun difisíl hirak-ne’e hotu, Nia buka oinsá tau ninia-aan, tau nia konfiansa no tau esperansa tomak iha Aman Maromak ninia liman,” nia haklaken.
Nia tenik, buka de’it mak Maromak nia vontade. Maromak nia vontade la’ós mate maibé moris, Maromak ninia vontade pás iha mizerikórdia, laran luak.
“Loron haat-nulu iha rai-fuik maran, kada minutu, kada oras no loron bá loron, Nia buka atu manán tentasaun. Atu nia la husik forsa hotu husi diabu santanas, Nia buka atu la husik hodi manán nafatin tentasaun. Nia tau konfiansa tomak atu obedese ba Maromak duké obedese ba isin nia hakarak,” Bispu haktuir.
Jornalista: Alexandra da Costa
Editór: Xisto Freitas Piedade
