VIKEKE, 14 Abríl 2025 (TATOLI)—Governu liuhusi Ministra Saúde (MS), Élia António de Araújo dos Reis Amaral hamutuk ho autoridade munisípiu Vikeke, segunda ne’e, inaugura fasilidade saúde izolamentu no armazen rai ai-mrouk ne’ebé konstrui iha suku Karaubalu, postu Vikeke Vila, munisípiu Vikeke.
Ministra Saúde, Élia António de Araújo dos Reis Amaral, hateten inaugurasaun ba fasilidade saúde ida-ne’e marka pasu importante husi kompromisu Governu hamutuk ho parseiru dezenvolviemntu sira, hodi asegura asesu saúde ho kualidade no seguru ba populasaun sira iha munisípiu Vikeke.
“Kona-ba izolamentu ida-ne’e ha’u fiar katak ita bele hadi’a kondisaun atendementu ba pasiente sira-ne’ebé presiza atendementu prolongada ka presiza akonpañamentu médiku. Ita hatene, iha momentu ita hari’i sala izolamentu ida-ne’e iha períodu COVID-19 nian, entaun ita presiza halo fila-fali oinsá ita halo preparasa di’ak liután, bainhira iha futuru ita enfrenta fila-fali surtu (virus) ruma,” Ministra Élia António de Araújo dos Reis Amaral hateten iha serimónia inaugurasaun sala izolamentu iha Vikeke, Beloi, ohin.
Izolamentu ida-ne’e bele utiliza ba atendementu pasiénte sira hodi hasa’e kualidade atendementu ne’e rasik, tanba bele fasilita hodi atende populasaun ho totál hamutuk 84 mill iha Vikeke.
“Ha’u espera katak ho infraestutra foun ida-ne’e ita bele utiliza ho responsablidade no kontribui mellora, indikadór saúde no kualidade moris ba ita-nia komunidad. Agradese mós parseiru dezenvolvimentu sira no empreza responsavél konstrusaun izolamentu ida-ne’e,” nia dehan. hato’o.
Iha fatin hanesan, Prezidente Autoridade munisípiu Vikeke, Francisco Cruz Simões de Gonzaga Soares, hhato’o agradesimentu ba Ministra Saúde (MS) ne’ebé marka presenza iha munisípiu Vikeke hodi halo inagurasaun ba izolmentu ida-ne’e.
“Ohin, ita halo inaugurasaun ba izolamentu Vikeke nian hodi fó atendementu ba ita-nia komunidade. Maske dezenvovimentu la’o neineik maibé beibeik. Tan ne’e, ita hahú faze inugurasaun ba fasildiade saúde nian ne’ebé sai importante ba setór saúde,” nia dehan.
Iha biban ne’e, diretór servisu saúde munisipál Vikeke, Aljacsono S. Maia, haktuir izolamentu referida sei nakfila ba internamentu tanba fatin ne’e kualidade no dignu ba atendementu populasaun iha munisípiu Vikeke.
“Ita haree obra ne’e kualidade no povu Vikeke merese hodi hetan tanba durante sira halerik ba kondisaun fasilidade saúde. Maibé, ohin, ita responde ona povu nian halerik sira-ne’e. Isolamentu ida-ne’e ho totál sala lima ho fasilidade totál kama baixa hamutuk unidade 24. Ha’u sente ida-ne’e sufisiente ba atendementu ba populasaun sira,” nia hateten.
Projetu konstrusaun edifísiu izolasaun COVID-19, ho totál orsamentu ba konstrusaun hamutuk $334,697.33, no obra referida konstrui husi empreza Peaceful Unipesoál, Lda, hahú halo konstrusaun iha loron 11 fulan-Outubru 2022.
Enkunatu, iha serimónia inaugursaun izolamentu ne’e hetan bensaun husi padre parokia Imakulada Vikeke Vila, akompañadu husi Minstra Saúde no autoridade Vikeke, pesoál saúde sira, no hafoin ne’e Ministra Saúde oferese komputadór ba servisu saúde munisipál Vikeke.
Iha inaugurasaun ne’e, partsipa husi komandante Polísia Nasionál Timor Leste (PNTL) munisípiu Vikeke, sekretáriu munisipál, diretór servisu munisipál no pesoal saúde sira husi postu lima.
MS inaugura armazen ai-moruk iha Vikeke
Entretantu, iha segund ane’e mós, Ministra Saúde, Élia António de Araújo dos Reis Amaral, inaugura armazen rai ai-moruk iha Beobe, suku Karaubalu, postu Vikeke Vila, munisípiu Vikeke.
Nia haktuir estabelesementu farmasia ka armazen rai ai-moruk ne’e reprezenta pasu fundamentál hodi hadi’a jestaun no disponiblidade ba ai-moruk esensiál sira iha munisípiu Vikeke.
“Ho lokalizasaun armazen ne’ebé besik liután iha ita-nia komunidade atu ita labele hamenus estoke out ai-moruk nian. Nune’e mós ho armazen ne’e hadi’ak kondisaun seguransa no kualidade ai-moruk nian, hodi bele responde ba nesesidade profisionál saúde no atendementu ba pasiénte sira iha Vikeke,” Ministra Élia António de Araújo dos Reis Amaral, hateten iha serimónia inagurasaun isolamentu Vikeke, Beloi, ohin.
Governante ne’e afirma, armazen farmasia ne’e hodi bele rai estoke ai-moruk esensiál sira inklui mós ekipamentu médiku sira seluk hodi responde ba neseidade postu saúde, sentru saúde no internamentu iha munisípiu Vikeke.
Hanoin hikas katak projetu konstrusaun armazen rai ai-moruk iha Orsamentu Jerál Estadu (OJE) tinan 2023 liuhusi projetu Programa Dezenvolvimentu Integradu Munisipál (PDIM) Vikeke, atu rai estoke ai-moruk ba Servisu Saúde munisípiu Vikeke.
Projetu referida hahú implementa konstrusaun iha fulan-Abríl tinan 2023 ho durasaun implementasaun projetu fulan-neen, ho responsável projetu Belas Lari Unipesoál, Lda, no kustu projetu $144.286.
Iha inaugurasaun ne’e hetan partisipa husi Prezidente Autoridade munisípiu Vikeke, Sekretáriu munisipál, komandante Polísia Nasionál Timor Leste (PNTL) munisípiu Vikeke, diretór munispál, diretór territoriál, administradór postu, xefe suku sira no pesoál saúde sira iha munisípiu Vikeke.
Jornalista : Vitorino Lopes da Costa
Editór : Cancio Ximenes
