DILI, 14 Abríl 2025 (TATOLI)—Komandu Polísia Nasionál Timor-Leste (PNTL) hamutuk ho Diresaun Nasionál Transporte Terrestre (DNTT), segunda ne’e, konvoka enkontru ho na’in ba loja hamutuk 200 iha kapitál Dili hodi ko’alia kona-ba jestaun ba estasionamentu iha sira-nia loja nune’e prevene engarrafamentu.
Iha enkontru ne’e, Komandu PNTL fó opsaun ba loja-na’in sira liuliu husu ba sira atu kria rasik sira-nia estasionamentu no opsaun segundu mak rekruta pesoál estasionamentu rua hodi manda karreta no motór sira-ne’ebé estasiona iha loja oin, liuliu ba sira-ne’ebé mak hola sasán nune’e prevene engarrafamentu iha estrada públika.
Komandante Jerál PNTL Interinu, Komisáriu Jerál Polísia Pedro Belo, agradese ba loja-na’in sira hamutuk 200 ne’ebé partisipa enkontru entre PNTL no DNTT ne’ebé ko’alia kona-ba prevensaun engarrafamentu.
“Agradese tebes-tebes tanba ita-boot sira mai iha-ne’e. Objetivu ita mai ne’e atu hamutuk buka solusaun ba problema engarrafamentu iha ita-nia sidade Dili,” Komisáriu PNTL dehan bainhira hasoru-malu ho loja-na’in sira, iha Sentru Formasaun Polísia (CFP-sigla portugés), Komoro, segunda ne’e.
Notísia relevante: PNTL-DNTT hahú implementa transporte estasiona liu minutu lima iha estrada protokolu selu koima $45
Belo husu ba loja-na’in sira karik atu rekruta pesoál parajen labele ema husi fatin seluk, maibé tenke ema bairru na’in para labele kria fali problema ho loja-na’in sira no tenke koordena ho autoridade lokál para hili joven sira.
“Kuandu ita-boot sira la konsege rekruta pesoál estasionamentu, entaun ita-boot sira bele bolu Ofisiál Polísia Suku hodi haree ita-nia estasionamentu. Maibé, ha’u husu imi labele fó osan ba OPS sira. Kuandu sira halo ida-ne’e (husu osan), entaun fó naran ba Komandu PNTL atu haree,” Pedro Belo afirma.
Iha fatin hanesan, Diretora DNTT, Maria Antónia, hateten enkontru entre PNTL no DNTT ho loja-na’in sira-ne’e importante tanba hamutuk atu solusiona problema engarrafamentu iha kapitál Dili.
“Ita-boot sira hatene DNTT hamutuk ho PNTL halo ona konferénsia imprensa iha semana rua liubá atu proibe karreta motór labele para liuliu estrada públiku liu minutu lima. Atu ezekuta Governu nia desizaun ida-ne’e ami, ami hamutuk ho polísia kontrola dalan protokolu hahú husi rotunda Estátua Prezidente Nicolau Lobato Komoro to’o Ponte BJ Habibie, Bidau,” nia haktuir.
Iha fatin hanesan, Diretór Nasionál Tránzitu Seguransa Rodoviária, Superintendente Asistenste Polísia Luís da Costa, informa loja-na’in sira iha kapitál aseita opsaun ne’ebé atu rekruta pesoál estasionamentu.
Reprezentante Loja Hadomi Kampung Baru, Maria Soares, aseita ho rekrutamentu ba pesoál estasionamentu tanba ida-ne’e di’ak nune’e bele kontrola vizitór sira-nia motór no karreta bainhira sira mai loja atu hola sasán nune’e labele provoka engarrafamentu.
Jornalista: Natalino Costa
Editór: Xisto Freitas da Piedade
