DILI, 14 Abríl 2025 (TATOLI)—Parlamentu Nasionál (PN) liuhusi sesaun plenária, segunda ne’e, aprova votu númeru 5/2025 pezár no solidariedade ba vítima sismu ne’ebé akontese iha Myanmar no Tailándia.
“Rezultadu votasaun afavór 58, kontra 0 no abstensaun 0, nune’e ho unanimidade ita espresa votu ne’e,” Prezidente Parlamentu Nasionál, Maria Fernanda Lay, fó sai iha sala plenária.
Votu pezár ne’e aprezenta husi Deputadu proponente Duarte Nunes (CNRT), Manuel Henrique Noronha (PD), Antonio Verdial de Sousa (KHUNTO), Maria Angelina Sarmento (PLP) no David Dias Ximenes Mandati (FRETILIN).
Notísia relevante : Vítima mortál husi rai-nakdoko iha Myanmar aumenta ba ema na’in-3.471
Tuir testu votu, ne’ebé meza lee sai iha plenária katak, PN Timor-Leste simu ho profundu konsternasaun notisía ba rai nakdoko ho episentru iha rejiaun Sagaing, Myanamar ne’ebé afeta mós Reinu Tailándia.
Relatóriu atuál indika ema lakon vida barak, enkuantu ema 100 lakon númeru ida signifikativu ho mós dezalojadu, agrava krise umanitáriu provoka husi rai nakdoko.
Momemtu ida-ne’e PN Timor-Leste espresa ninia profundu pezár ba katástrofe ida-ne’e, manifesta ninia solidariedade ba vitítima no povu Myanmar no Tailándia no aprezenta ninia sinsera kondolénsia ba família enlutada no afetadu hotu iha trajédia ne’e.
Jornalista : Nelson de Sousa
Editora : Julia Chatarina
