DILI, 07 Abríl 2025 (TATOLI) – Númeru vítima mortál kauza husi rai-nakdoko kontinua aumenta ba ema na’in-3.471, enkuantu esforsu husi ekipa buska no resgate kontinua hetan vítima sira, informa mídia estatál iha domingu (6/4).
Tuir informasaun ne’ebé TATOLI sita husi Antara, sizmu ho magnitude 7,7 ne’ebé akontese iha 28 Marsu ne’e mós kauza ema na’in-4.671 mak hetan kanek no to’o sábadu ne’e ema na’in-214 mak sei lakon.
Kuaze ema 653 mak iha uma ne’ebé monu nia okos no ekipa resgate lokál no internasionál salva ona, enkuantu mate-isin 682 konsege evakua husi edifísiu ne’ebé rahun.
Koordenadór Asisténsia Emerjénsia ONU, Tom Fletcher, ne’ebé halo vizita bá sobrevivente sira iha Mandalay – sidade ne’ebé lokaliza besik episentru rai-nakdodo – deskreve situasaun hanesan buat ida ne’ebé “xokante” no husu ba komunidade internasionál atu “unidu hodi apoia povu Myanmar”.
Grupu husi organizasaun umanitária oioin preokupa katak kombinasaun entre udan irregulár no temperatura estrema bele provoka surtu hanesan kólera, entre sobrevivente ne’ebé forsadu toba iha ár livre.
“Família barak mak toba iha li’ur, iha sira-nia uma ne’ebé hetan destruisaun, enkuantu mate-isin husi ema ne’ebé sira hadomi sei retira husi uma ne’ebé rahun ne’e. Iha ta’uk ne’ebé mosu ba réplika rai-nakdoko nian”, Fletcher hakerek iha nia konta X.
Aleinde ne’e, liña komboiu Yangon-Mandalay no Aeroportu Internasionál loke fali ona depoizde taka tanba hetan danu ne’ebé kauza husi rai-nakdoko.
Sizmu ne’e kauza danu ba barreira bee nian hamutuk 60 no ponte ba komboiu 11, nomós kauza liña komboiu nia kle’uk iha pontu balun.
Iha nasaun viziña Tailándia, númeru vítima mortál kauza husi sizmu aumenta ba 24, enkuantu na’in-77 mak sei lakon.
Notísia relevante: Vítima mortál kauza husi rai-nakdoko iha Myanmar aumenta ba 2.800
TATOLI
