DILI, 03 Abríl 2025 (TATOLI – Númeru vítima mortál kauza husi rai-nakdoko iha Myanmar ne’ebé akontese iha semana kotuk aumenta ba ema na’in-2.800, ho 4.600 seluk mak hetan kanek.
Informa husi Governu militár Myanmar iha kuarta (3/4), loron lima depoizde katástrofe ne’ebé agrava krize umanitária iha nasaun ne’ebé iha hela funu sivíl ne’e.
Tuir notísia ne’ebé TATOLI sita husi Antara, númeru vítima ne’ebé kauza husi sizmu ho magnitude 7,7 ne’ebé doko rejiaun sentrál Myanmar sei kontinua aumenta, tanba ema atus mak sei iha hela uma ne’ebé monu nia okos iha Mandalay, sidade boot daruak, ne’ebé besik loos ba espisentru rai-nakdoko, ne’ebé iha limitasaun ba ekipamentu pezadu.
Dadus resente kona-ba vítima sira ne’e fó sai depoizde grupu armada tolu étnika minoria ne’ebé hola parte iha aliansa ida anunsia sesar-fogu unilaterál durante fulan ida iha luta kontra militár iha loron ida antes, atu apoia esforsu ajuda ba terramotu ne’e.
Grupu armada tolu kompostu husi Ezérsitu Arakan, Ezérsitu Aliansa Demokrátika Nasionál Mtanmar no Ezérsitu Libertasaun Nasionál Ta’ang, deklara iha tersa ne’e katak sira sei la lansa operasaun ofensiva no sei halo de’it asaun atu halo defeza ba aan hodi garante andamentu operasaun umanitária.
Sesar-fogu unilaterál mós fó sai ona iha sábadu husi Governu paralelu ne’ebé forma husi membru Governu sivíl Aung San Suu Kyi, ne’ebé monu iha kudeta iha Fevereiru 2021.
Enkuantu, husi parte militár seidauk deklara atu hapara nia atake sira. Tuir informasaun husi mídia lokál, sira kontinua halo atake aéreu iha área kontrolada husi forsa opozisaun ne’ebé komposta husi grupu rebelde oioin étnika minoria no Governu Unidade Nasionál.
Iha kuarta, Junta Militár hateten katak membru liu 1.500 husi ekipa resgate estranjeira halo hela evakuasaun depoizde rai-nakdoko maka’as iha Myanmar.
Iha loron ne’ebé hanesan, ekipa médika husi Japaun to’o iha Yangon atu haruka apoiu emerjénsia, inklui materiál saneamentu, bee no purifikadór bee nian.
Notísia relasionada: Timor-Leste kontribui rihun $500 hodi responde ba situasaun emerjénsia iha Myanmar
TATOLI
