DILI, 02 Abríl 2025 (TATOLI) – Timor-Leste halo kontribuisaun voluntária rihun $500 ba Sentru Koordenasaun Asisténsia Umanitária ASEAN ka ASEAN Coordinating Center for Humanitarian Assistance (AHA Center).
Tuir nota husi Governu, kontribuisaun ida-ne’e hodi apoia resposta ba situasaun emerjénsia iha Myanmar, tanba kauza husi rai-nakdoko foin lalais, ne’ebé afeta ba rejiaun ne’e, ho konsekuénsia grave, inklui lakon vida, dezlokasaun populasaun no destruisaun ba infraestrutura sosiál, ekonómika no ambientál.
Antes ne’e, Timor-Leste espresa nia konsternasaun no solidariedade ho Governu no povu Tailándia no Myanmar, ne’ebé afetadu husi rai-nakdoko ne’e.
Primeiru-Ministru, Kay Rala Xanana Gusmão, deklara: “Povu Timor oras ne’e sente laran-triste tebetebes tanba trajédia ne’ebé halakon ema barak nia vida no estraga buat barak iha ami-nia paíz viziñu sira. Ho laran tomak ami hato’o ami-nia sentimentu solidariedade no ami hotu prontu atu fó tulun ba ami-nia belun di’ak sira iha mementu ida difísil ne’e”.
Governu Timor- Leste prontu atu oferese kualkér asisténsia ne’ebé bele tulun esforsu ba rekuperasaun no rekonstrusaun.
Tuir Ajénsia Notisioza Indonézia Antara, vítíma mortál kauza husi sizmu ho magnitude 7,7 ne’ebé afeta Myanmar iha sesta (28/3) hamutuk 2.719.
Aleinde ne’e, ema hamutuk 4.521 mak kanek no 440-resin ne’ebé sei fó sai hanesan lakon.
Resposta ba katástrofe ne’e, Myanmar fó sai lutu nasionál durante loron hitu hahú iha segunda (31/3).
Ho tempu ne’ebé la’o no iha ema barak ne’ebé seidauk hetan, númeru vítima mortál bele kontinua aumenta.
Notísia relevante: Timor-Leste manifesta solidariedade ho povu Tailándia no Myanmar
Jornalista: Arminda Fonseca
Editora: Maria Auxiliadora
