DILI, 29 Marsu 2025 (TATOLI) – Timor-Leste espresa nia konsternasaun no solidariedade ho Governu no povu Tailándia no Myanmar, ne’ebé afetadu husi rai-nakdoko ho magnitude 7,7.
Katástrofe ne’ebé akontese iha loron 28 fulan-Marsu ne’e kauza vítima mortál, kanek no estragu materiál oioin.
“Timor-Leste hamutuk iha sofrimentu povu maun-alin sira rejiaun ne’e nian no hato’o nia sentida kondolénsia sinsera ba família vítima sira-nian, hodi dezeja rekuperasaun lalais ba sira ne’ebé kanek no ba sira ne’ebé afetadu diretamente husi kalamidade ne’e”, informa nota husi Governu ne’ebé TATOLI asesu, ohin.
Dokumentu ne’e haktuir katak Governu hamriik iha solidariedade ho esforsu emerjénsia no rekonstrusaun nian iha nasaun afetada sira, hodi rekoñese reziliénsia no forsa husi sira-nia populasaun iha tempu adversidade boot ida-ne’e.
Portavós Governu Konstitusionál Dasiak, Ministru Prezidénsia Konsellu Ministru, Agio Pereira, ho Ezekutivu tomak nia naran espresa nia “solidariedade ho povu no Governu sira Tailándia no Myanmar nian ne’ebé afetadu husi katástrofe ida-ne’e”.
“Iha tempu susar ida-ne’e, ami-nia hanoin hamutuk ho vítima sira no sira-nia família no ami rekoñese sira hotu ne’ebé komprometidu atu kontinua tulun komunidade sira ne’ebé afetada”, nia hateten.
Tuir Ajénsia Notisioza Indonézia Antara, ho katástrofe ida-ne’e hamate ona pelumenus ema na’in-144 no 732 mak kanek iha Myanmar.
Líder junta Mynamar, Min Aung Hlaing, informa katak númeru vítima mortál no vítima kanek estima katak sei aumenta.
Iha Myanmar, rai-nakdoko ne’e, ne’ebé nia episentru lokaliza besik sidade Mandalay, hamosu deklarasaun estadu emerjénsia nian iha rejiaun oioin nasaun nian.
Iha Tailándia, pelumenus ema na’in-10 mate no 81 mak lakon hafoin edifísiu ne’ebé sei iha hela konstrusaun monu.
TATOLI
