NATARBORA, 14 Abríl 2025 (TATOLI)—Komunidade postu administrativu Bariki/ Natarbora, munisípiu Manatutu husu ba Governu liuliu Ministériu Obra Públika (MOP) atu konstrui lalais ponte Lamara ne’ebé aat tinan barak ona.\
“Ha’u husu ba Governu se bele tau atensaun netik ba ami-nia ponte ida Lamara ne’e, aat tinan barak ona. Ponte ne’e liga Natarbora ba Soibada liu ba Manatutu-Vila, tempu udan ami susar tebes atu ultrapasa ba mai,” Komunidade Sebastião da Costa nu’udar mós lia-na’in Natarbora hateten ba Agência TATOLI iha Natarbora, sábadu (12 Abríl 2024) ne’e.
Nia dehan, antes Governu atu konstrui autoestrada tenke konstrui uluk ponte Lamara ne’ebé aat seidauk hadi’a to’o ohin loron.
“Dezenvolvimentu ami aseita. Ami simu no koopera maibé antes atu hakat ba autoestrada ida boot ne’e tenke hadi’a uluk ami-nia ponte ne’e. Na’i-ulun sira, la’o liu ba-mai haree hela de’it, sira-nia sentimentu ne’e iha ne’ebé tiha ba,” nia dehan.
Iha fatin hanesan, komunidade Natarbora, Amelia Soares, husu ba Governu atu hadi’a mós ponte Dilor ligasaun Natarbora ba Vikeke ne’ebé kondisaun sei aat nafatin.
“Ponte Lamara mós hanesan, ida tan mak Dilor, se bele na’i-ulun sira hadi’a netik ba. Ami presiza ponte di’ak, ami atu halo movimentu ba mai, tempu uda ponte rua ne’e ami labele liu ba mai tanba korrente mota boot tebes,” nia dehan.
Hatán ba preokupasaun hirak ne’e, Diretór Jerál Abitasaun Urbana Ministériu Obra Públika, Domingos de Jesus Siqueira, hateten ponte no estrada hirak ne’ebé aat iha Natarbora proposta tama ona iha ministériu maibé ho orsamentu ne’ebé boot presiza haree didi’ak.
“Ko’alia kona-ba Ponte Lamara no estrada sira aat iha Natarbora ne’e hamutuk ho estrada sira iha munisípiu hotu proposta tama iha MOP hamutuk 375, entaun ami sei haree ida ba ida. Ami la’ós atende de’it Manatutu maibé atende munisípiu hotu, entaun ita sei haree iha tempu besik mak bele halo konstrusaun maibé faze por faze,” Diretór Jerál ne’e esplika.
Antes ne’e, iha 23 fulan-Fevereiru 2024, Ministru Obra Públiku, Samuel Marçal, hala’o monitorizasaun ba Ponte Lamara, Natarbora, Manatutu inklui ponte rua (2) iha Betano, ponte Selihasan no ponte Kasaboka, orienta ona ekipa tékniku husi MOP atu tau atensaun ba ponte hirak ne’e.
Kona-ba ponte Lamara, tékniku sira informa ona katak hein verifikasaun husi Ajénsia Dezenvolvimentu Nasionál, Institutu Públiku (ADN, I.P), hafoin ADN halo ona verifikasaun kompañia bele hala’o ona nia servisu.
Jornalista : Hortencio Sanchez
Editór : Cancio Ximenes
