ANKARA, 14 Abril 2025 (TATOLI) – Profisionál komunikasaun sosiál oioin hosi Estadu-Membru Asosiasaun Nasaun Sudeste Aziátiku (ASEAN) no Timor-Leste sei tuir formasaun kona-ba Social Media and Digital Journalism Training Program for Journalists, husi loron 14 to’o 18 fulan ne’e, iha Ankara, Turkia.
Inisiativa ne’e organiza hosi Agénsia Kooperasaun no Koordenasaun Turkia (TiKA) kolabora ho Rádiu no Televizaun Turkia (TRT) no parseria ho Sekretariadu ASEAN. Eventu ne’e reflete ba kompromisu Governu Turkia nian hodi kontribui ba dezenvolvimentu rejiaun sudeste aziátiku no promove relasaun ida ne’ebé besik liu tan ho Estadu-Membru iha rejiaun liuhusi esforsu kolaborativu sira iha meiu komunikasaun sosiál.
Programa ne’e ho objetivu kontribui ba hametin relasaun entre profisionál sira iha meiu komunikasaun sosiál, hadi’a kompeténsia jornalístika iha sudeste aziátiku liuhusi formasaun komprensivu oinsá atu utiliza ferramenta dijitál iha tendénsia jornalizmu atuál.
Tuir fonte TiKA nian, “programa ne’e la’ós de’it kontribui ba dezenvolvimentu profisionál jornalista sira hosi país ASEAN no Timor-Leste nian, hanesan mos reforsa lasu kooperasaun ho Turkia. Inisiativa ida ne’e subliña kompromisu ezekutivu Turkia nian hodi apoia dezenvolvimentu rejionál no promove relasaun amizade ho Estadu-Membru organizasaun, liuhusi esforsu koolaborasaun iha meiu komunikasaun sosiál”.
“Formasaun ida-ne’e sei abranje ba tópiku esensiál sira, espesialmente ba kompeténsia prátika ne’ebé sei aplika imediatamente iha kontestu profisionál. Objetivu seluk mak kontribui hametin relasaun entre profisionál komunikasaun sosiál atu iha koñesimentu adekuadu, nune’e sei efetivu liutan bainhira halo publikasaun ba notísia sira no kontribui ba hametin diálogu entre Turkia ho ASEAN nomos reforsa kompreensaun mútua iha setór oioin”, refere dokumentu TiKA nian ne’ebé TATOLI asesu.
Espetativa husi programa ne’e
Hein katak partisipante sira iha programa formasaun ne’e sei aumenta di’ak liutan sira-nia kompeténsia iha kriasaun konteúdu sira iha meiu dijitál. Alénde ne’e, partisipante sira sei hetan koñesimentu kona-ba estratéjia konteúdu ne’ebé efikás no sei kontribui ba prosesu editoriál iha plataforma dijitál.
Formasaun ida-ne’e sei permite mós ba partispante sira oinsá utiliza formatu oioin iha notísia, hanesan artigu, vídio, infografia no podcasts. Programa ida ne’e sei sentra mós kona-ba monitorizasaun ba kontéudu sira, sukat envolvimentu públiku nian nomos otimiza estratéjia konteúdu bazeia ba dadus.
Partisipante sira sei hadi’a di’ak liutan profisiénsia iha jornalismu rede sosiál, aprende estretéjia halibur notísia no halo reportajen hodi publika iha plataforma sira hanesan Twitter, Facebook no Instagram. Alénde ne’e, sei hetan mós koñesimentu kona-ba atu envolve audiénsia (públiku) sira nian no otimiza konteúdu sira ba plataforma rede sosiál.
Partispante sira sei kompetente liutan iha Jornalismu Móvel (Mojo), oinsá utiliza telemóvel hodi halo reportajen ba notísia ho lalais no prodús kontúdu multimédia no kualidade. Partisipante sira mós sei hetan koñesimentu kona-ba kompeténsia prátika, oinsá utiliza ferramente dezeñu gráfiku bazeia ba Web, hanesan Canva, Piktochart no GIMP, ne’ebé sei permite formandu sira atu halo gráfiku, infografia no aprezentasaun nível profisionál, nune’e bele kontribui signifikativamente ba produsaun konteúdu dijitál.
Ikus liu, formasaun referida nia objetivu jerál mak jornalista sira hosi ASEAN no Timor-Leste atu eleva sira nia koñesimentu iha prátika jornalismu dijitál, hadia kualidade konteúdu no adapta iha kampu dinámiku meiu komunikasaun dijitál nian.
Partisipa iha formasaun ne’e jornalista sira hosi Indonézia, Malázia, Brunei Darussalam, Kamboja, Myanmar, Laos, Filipina, Tailándia e Timor-Leste.
Notísia relevante: KI realiza formasaun jornalizmu ambientál ba jornalista 29 iha Liquiça
Jornalista: Afonso do Rosário
Editora: Isaura Lemos de Deus
