VIKEKE, 14 Abríl 2025 (TATOLI)—Ministra Saúde, Élia António de Araújo dos Reis Amaral, informa tékniku Ministériu Saúde prosesa ona dezeñu planu konstrusaun ospitál munisipál Vikeke nian.
“Kona-ba planu konstrusaun ospitál munisipál ba munisípiu Vikeke ami finaliza faze diskusuan no daudaun ne’e tama ona prosesu dezeñu konstrusaun hospitál nian. Bainhira dezeñu konklui ona, ami sei fó sai ba públiku,” Ministra Saúde, Élia António de Araújo dos Reis Amaral, hateten ba jornalista sira, iha internamentu Vikeke, ohin.
Governante ne’e subliña, prosesu dezeñu ba konstrusaun ospitál durasaun fulan-tolu bele to’o fulan-neen hafoin ramata dezeñu, no tuir planu sei implementa iha tinan 2026.
“Ita espera ospitál ba munisípiu Vikeke sei realiza iha tinan 2026, orsamentu husi ADB ho montante ba obra ospitál hamutuk milaun $3,” nia dehan.
Iha fatin hanesan, Prezidente Autoridade munisípiu Vikeke, Francisco Cruz Simões de Gonzaga Soares, hateten daudaun ne’e munisípiu Vikeke sei iha Internamentu, planu ba konstrusaun ospitál munisipál hodi prepara dezentralizasaun podér lokál nian.
“Ita agora iha nivél Internamentu no planu konstrusaun ospitál munisipál ne’e sai importante ba ita, atu ita bele prepara aan ba simu implementasaun dezentralizasaun administrativa bo podér lokál sai mós rekezitu ida,” nia dehan.
Antes ne’e, PAM Vikeke identifika ona rai ba konstrusaun ospitál ne’ebé komunidade Kaiboki, aldeia Mane-Haat, suku Karaubalu, postu Viqueque Vila, munisipiu Viqueque, ofisialmente entrega rai ba Governu liuhusi autoridade munisipiu Vikeke atu konstrui ospitál munisipál.
Rai ne’ebé komunidade entrega ona ba Governu ho medida rai metru 200 x 100 ne’ebé lokaliza iha área Manuwe-Matan, Kaiboki, aldeia Mane-Haat, suku Karaubalu, postu Viqueque Vila.
Notísia Relevante: https://tatoli.tl/2025/02/11/komunidade-mane-haat-entrega-rai-ba-governu-konstrui-ospital/
Jornalista: Vitorino Lopes da Costa
Editór : Cancio Ximenes
