DILI, 15 Abríl 2025 (TATOLI) – Kruz Vermella Timor-Leste (CVTL) asina akordu subvensaun públika tinan-2025, Governu da-sia, liuhusi Vise Primeiru-ministru koordenadór asuntu sosiál dezenvolvimentu rurál no abitasaun komunitária ho montante $700.000, hodi melloria implementasaun programa tolu ne’ebé identifika no kompromete sei hala’o knaar ho imparsialidade hodi servi povu.
Programa sira-ne’ebé mak mensiona iha proposta laran ne’e, sai hanesan baze ida para bele servisu ho transparánsia hodi lori programa sira-ne’e ba bein-estar komunidade ne’ebé mak susar liu iha área rurál. No, kompromete katak sei hala’o knaar ho didi’ak nune’e bele fornese programa ne’ebé kualidade ba komunidade sira.
Vise-Primeiru Minsitru Dezenvolvimentu Rurál no Abitasaun Komunitária, Mariano Assanami Sabino hateten katak organizasaun ida-ne’e iha fatin hotu-hotu sira sempre apoiu, iha tempu difisíl populasaun nian. Iha fatin sira-ne’ebé mak povu hasoru problema hanesan dezastre, fatin sira-ne’ebé funu, sira sempre iha ne’ebá.
“Tanba ne’e mak CVTL mós nafatin ho espíritu ida-ne’e atu nafatin bele haktuir lisaun Kruz Vermella internasionál nian. Ita hanoin katak ho apoiu ne’ebé mak ki’ik maibé apoiu ne’e signifikante tebes para bele hamoris nafatin espíritu voluntarizmu, unamizmu apoiu malu”, Governante ne’e informa ba jornalista sira iha salaun GASC, Palásiu Governu, Dili, ohin.
Assanami konsidera katak valór iha sosiedade komesa mihis daudaun ona tanba ne’e fila fali ba servi iha área rurál sira, halo sistema koezaun espesiál ne’ebé di’ak, apoiu no ajuda malu, liuliu juventude sira.
“Joven balun ne’ebé la kontinua eskola maibé oportunidade ne’e sira bele hamutuk ho CVTL hodi hamosu espíritu voluntáriu no mekanizmu ne’e tenke hahú tranzisaun ida entre joven ne’ebé tenke iha responsabilidade molok forma uma-kain”, governante ne’e hateten.
Iha oportunidade ne’e, Sekretáriu jerál CVTL, Luís Pedro Pinto agradese entidade hotu – governu no autoridade públiku, hodi fasilita sira-nia nesesidade liliu iha área rurál.
“Konfiansa ida-ne’e sei tau iha fuan. No, knaar bazeia ba prinsípiu; neutrál nafatin, imparsiál nafatin, umanizmu nafatin, no voluntarizmu nafatin, para bele servi povu,” nia garante.
Sekretáriu jerál Luís Pedro Pinto dehan katak atividade prioritária ne’ebé sira sei haree mak bee-moos – implementa iha área rurál, no programa ba joven sira oinsá eleva sira-nia koñesimentu no formasaun ba abilidade moris (life skill training) no mós programa jestaun dezastre naturál.
Atividade sira ne’e sei apoia ba iha dezenvolvimentu organizasaun ninian inkluzivamente programa sira ne’ebé hala’o iha komunidade área rurál no munisípiu haat ne’ebé identifikadu hodi implementa mak hanesan Baukau, Likisá, Aileu no Manatutu.
Apoiu ne’ebé oferese husi Governu, tuir Sekretáriu jerál Luís Pedro Pinto, nia atinjimentu mak hasa’e koñesimentu juventude iha komunidade nia leet; saudavél, iha kapasidade atu hala’o atividade sira iha setór oioin hanesan agrikultura, negósiu, edukasaun no seluktan.
“Implementa mós programa bee-moos, liga ba nutrisaun atu organiza komunidade kuda rasik modo, kuaze atinjimentu lubun ida ona mak ita halo liuhusi programa integradu ne’e bele fó benefísiu di’ak ba komunidade sira”, nia énfaze.
Iha fatin hanesan, Koordenadór Gabinete Apoiu Sosiedade Sivíl, Joaquim da Costa Freitas, kongratula CVTL tanba Governu eskolla hanesan parseria estratéjiku iha intervensaun ba programa sira-ne’ebé maka liga diretamente ho komunidade nia moris.
“Espera katak valór ne’ebé maka previstu iha kontratu laran bele utiliza didi’ak iha ninia ezekusaun maibé atu mós informa de’it katak Governu estabelese parseria ho Kruz Vermella Timor-Leste la’ós foun maibé iha tinan naruk halo servisu sira-ne’ebé mak diretamente liga ba komunidade nia moris”, nia espera.
Koordenadór Joaquim da Costa Freitas akresenta, kooperasaun entre Governu ho CVTL liuhusi parseria ne’e hanesan konfiansa ida tanba ezisténsia CVTL bele ajuda Governu hodi halo intervensaun ba atividade sira ne’ebé maka liga diretamente ho komunidade.
“Iha proposta ne’ebé mak hato’o husi Kruz vermella mak primeiru sira-nia intervensaun konsentra liu ba juventude, organiza juventude ho prosesu integradu sira-ne’e, segundu organiza komunidade iha intervensaun kanaliza bee-moos iha área rurál, no mós intervensaun ne’ebé CVTL sei halo mak liga ho dezastre naturais”, nia haktuir.
Entretantu, akordu kooperasaun ida-ne’e sei válida to’o 31 Dezembru 2025 no iha prosesu implementasaun, tékniku GASC kontinua halo monitorizasaun ba programa sira-ne’ebé mak finansia husi GASCH, ikusliu mak sei halo avaliasaun ba gastu no rezultadu ne’ebé hetan iha tinan ida-ne’e.
Jornalista: Alexandra da Costa
Editór: Rafael Ximenes de A. Belo
