BOBONARU, 15 Abril 2025 (TATOLI)—Komunidade no motorista sira preokupa ho kondisaun estrada iha área Galisapulu, suku Lahomea, postu administrativu Maliana, munisípiu Bobonaru tanba espasu rai falta de’it ona metru ida-resin atu kotu totál.
Notísia Relevante: Autoridade lokál preokupa bee nalihun iha estrada ligasaun Maliana-Bobonaro
Reprezentante Komunidade Galisapulu, Bernardete Maia, husu ba Ministériu Obra Públika, atu tau-atensaun urjénsia molok estrada ne’e kotu totál.
Nia argumenta, bainhira estrada ne’e kotu, movimentasaun transporte públiku no privada husi diresaun kapitál Maliana ba postu administrativu Bobonaru no Loloto’e tenke paradu totál, tanba laiha tan dalan alternativu.
“Ami ezije Governu hadi’a lalais, tanba estrada ida-ne’e hela uitoan, metru ida-resin de’it ona. Se udan mai tan agora bele kotu, tanba ita haree Penahan ponte iha kra’ik ne’ebá ne’e monu hotu ona. Depois ida leten ne’e mós komunidade mak ateru de’it ho rai ho fatuk, nune’e karreta ho motor bele liu ba mai,” Nia informa ba Agência Tatoli iha terrenu, tersa ne’e.
Bernadete haktuirm estrada ne’e hetan estragu husi dezastre naturál iha tinan hirak liubá, maibé to’o ágora hela de’it ona espasu ba karreta ida-nia de’it ona mós Governu seidauk rezolve.
“Agora hela de’it rohan, karreta ida-nian de’it ona. Uluk sei di’ak, agora nakfera hotu tanba udan. Depois kareeta Fuzu-boot tula fatuk ho rai-henek liu ba-mai hanehan makaas, entaun klaran ne’e mós komesa mosu sinál atu fera. Ne’e la book lalais, udan mai makaas tan bele monu, no karreta ho motorizada sira labele la’o no paradu totál,” nia hateten.
Aleinde ne’e, motorista Kamioneta, António Marques, reforsa Governu presiza atensaun duni, tanba kondisaun estrada ne’e perigu no bele fó ameasa ba ema-nia vida.
“Ita liu ba-mai ne’e, karreta rua hasoru malú ladi’ak. Ezemplu, hanesan ami tula rai-henek ka sasán todan ne’e hodi mentál de’it mak liu estrada ne’e, tanba rai ne’e hela rohan de’it ona. Ita tula todan-liu, kuidadu la halimar, se lae’e karreta halis ba sorin-sorin makaas bele monu ba mota-laran. Perigu liu mak kondutór oin foun sira-ne’e, hanoin rai toos mak hola fali kraik makaas liu ne’e nia bele monu, tanba iha kraik ne’e mamar hela,” nia hateten.
Motorista ne’e mós husu Governu atu tau prioridade iha Orsamentu Jerál Estádu tinan 2026 hodi rezolve estrada ne’e, tanba estrada ne’e liga husi kapitál munisípiu Bobonaru ba postu administrativu no munisípiu Ermera ho Kovalima.
“Ami tinan 20 ona preukupa tebes estrada ne’e. Udan ona, ita liu ba-mai hanesan mota, bee ho taho mak nakonu. Agora, ita-bo’ot bele haree realidade taho loos ne’e, karreta kiik sira liu araska. Dalaruma sira tama sala mout to’o roda ko’ak hotu, depois motor mós hanesan, ita oin foun ne’e tama sala bele monu. Tanba, bee nakonu ita lahtene dalan di’ak mak ne’ebé, aat mak ida ne’ebé, ne’e ami husu ita-nia Estádu favór boot ida tau-matan netik ba,” nia dehan.
Enkuantu Estrada diresaun Kapitál Maliana ba postu administrativu Bobonaru ne’e, iha tinan 2017 ne’e, Ministériu Obra Públika, Transporte no Komunikasaun, kontrata empreza lokál Vieramor Unipesoál, Lda, hodi halo manutensaun estrada no ponte ho kustu millaun $2,060, 737.42, maibé projetu ho karáter emerjénsía ne’e to’o agora seidauk finaliza no paradu hela, tanba Governu sei halo fali revizaun ba dezeñu Planta no Kadernu Enkargu (PKE) ka Bill off Quantity (BoQ).
Notísia Relevante : Administradór hato’o preokupasaun problema Estrada Maliana-Bobonaro ba MOP
Jornalista : Sergio da Cruz
Editór : Cancio Ximenes
