DILI, 15 Abríl 2025 (TATOLI)-Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, rekomenda ba Governu atu halo koordenasaun entre ministeriál bainhira implementa projetu sira.
“Ministériu hotu-hotu atu implementa projetu-ida labele afeta ba ministériu seluk, kuandu halo estrada sei afeta ba eletrisidade, bee, inklui halte sira”, dehan nia ba TATOLI iha ninia knar fatin, Kaikoli, tersa-ne’e.
Tuir nia, falta koordenasaun entre ministeriál sei afeta ba gastu husi osan Estadu. “Prinsípiu boa governasaun no promove efisiensia no efikasia, rona mós públiku nia opiniaun, nune’e planu ho serteza”.
Nia mos rekomenda ba ezekutivu sira atu halo planu estratéjiku ba projetu loke no taka estrada iha kapitál, bainhira laiha planu ida-ne’e sei hamosu má-gastu, tanba sei hamosu duplikasaun ba rekursu ne’ebé la util no gastu ne’ebé la produtivu.
“Governu iha esperansa atu halo mudansa ne’ebé lalais ho di’ak, saida mak halo hodi mellora valeta sira ne’e presiza duni maibé ba estrada sira mak imajen ita ko’a depois tau fali simente, tuir aspetu tékniku labele asegura kualidade tanba kuandu simente ho alkatraun tau hamutuk sei la garante kualidade”, nia argumenta.
Tanba ne’e, nia realsa bainhira planu di’ak, bele asegura no garante efisiensia ba despesa no obra ne’ebé halo bele uza ho tempu naruk.
Organizasaun Naun Governamental (ONG) Hali Ba Dame (HABADA), Abel Amaral, konsidera atividade projetu ne’ebé la’o ninia impaktu ba engarafamentu.
“Futuru tenke koordena ho institutu Estadu relevante sira hanesan PNTL, nune’e sira bele koloka pesoál hodi armoniza no organiza transporte”, nia rekomenda.
Notísia relevante: MTK no MAE koordena hodi rezolve parajen públiku ne’ebé SEATOU sobu
Jornalista : Osória Marques
Editora : Rita Almeida
