KOVALIMA, 15 Abríl 2025 (TATOLI) – Autoridade Protesaun Sívil (APC-sigla Portugés), alerta ba komunidade sira iha munisípiu Kovalima atu kuidadu aan no hadook aan husi fatin ne’ebe risku ba dezastre naturál.
Komandante APC, Munisípiu Kovalima, Celestino Ferreira Afonso, informa katak, bazeia previzasaun tempu husi Dirasaun Nasionál Meterolojia no Geofízika (DNMG) fó sai katak iha loron 10 to’o loron 13 fulan ne’e sei akontese anin boot iha parte kosta sul maibé daudaun ne’e iha munisípiu Kovalima udan durante loron rua ona.
“Relasiona DNMG fó sai katak sei akontese anin boot nune’e bele afeita ba ita-nia komunidade sira nune’e hanesan Autoridade protesaun sívil alerta ba ita-nia komunidade sira atu hadook aan husi fatin risku sira hanesan hela iha foho-lolon no mota-ninin atu labele lori risku ba komunidade sira”, Celestino Ferreira Afonso informa, ba jornalista iha Kovalima, ohin.
Notísia relevante:Kondisaun klíma, DNMG husu komunidade toma atensaun
Ho tempu udan nune’e APC fó hanoin ba komunidade sira aleinde hasees husi fatin risku husu atu komunidade sira tesi ai sira ne’ebé besik uma-ninin nune’e labele afeita ba komunidade nia uma hela fatin.
Komunidade sira mós presiza kuidadu labarik sira bainhira iha tempu udan kontrola labarik sira atu labele halimar iha valeta nune’e bele hadook aan risku ba dezastre naturál sira.
Bazeia ba dadus durante trimestre ba dahuluk APC rejista ona vítima ba dezastre naturál hamutuk 41 ne’ebé fó ona apoiu emerjénsia ai-han ho la’ós ai-han ba vítima dezastre naturál ho tipu sira hanesan, ahi han uma, anin sobu uma no tipu dezastre erozaun.
Vítima uma-kain 41 husi númeru ne’e, vítima uma-kain 20-resin mak prienxe kritériu atu hetan apoiu materiál rekuperasaun no sira seluk APC fó de’it apoiu emerjénsia ba vítima sira dezastre naturál sira ho tipu oioin.
Notísia relevante:APC Nasionál fahe esperiénsia jestaun risku dezastre ba APC Kovalima
Jornalista: Celestina Teles
Editór: Rafael Ximenes de A. Belo
