DILI, 15 Abríl 2025 (TATOLI)—Polísia Sientífika Investigasaun Kriminál (PCIC-sigla portugés), solisita Ministériu Públiku (MP) atu promove mandadu detensaun hodi detein dirijente Igreja Katólika Karizmátika (ICCTL-sigla portugés) tanba atividade ne’ebé grupu ne’e halo konsideradu iha inísiu ba enkuadramentu krime.
“Hafoin PCIC rekolla tiha prova hodi halo analiza no ezame ba prova sira-ne’e, PCIC haree katak hahalok ne’ebé mak sidadaun sira-ne’e komete prenxe enkuadramentu krime ka elementu krime ne’ebé mak Ministériu Públiku imputa ba arguidu sira, liuliu krime burla agravada, asosiasaun kriminoza no diskriminasaun rasiál relijioza. Tanba ne’e, PCIC nu’udár autoridade kompetente sei solisita ba Ministériu Públiku atu promove mandadu detensaun hodi detein sidadaun sira-ne’e,” Xefe Investigadór Polísia Sientífika Investigasaun Kriminál (PCIC-sigla portugés), Mário Tavares, hateten ba jornalista sira liuhusi konferénsia imprensa ne’ebé hala’o iha edifisiu PCIC, Kaikoli, tersa ne’e.
Nia hatutan, PCIC kontinua halo delijénsia Investigasaun ba kazu ne’e no bazeia ba PCIC nia ezaminasaun ba kazu ne’e deteta katak iha dispozitivu ba informátiku balun ne’ebé mak hatudu hahalok sira-ne’ebé sidadaun sira-ne’e halo iha duni indísiu krime.
Notísia relevante: PCIC asegura dirijente ICCTL
Tuir investigadór Mário katak iha sesta (11/4), PCIC ezekuta mandadu judisiáriu hodi halo auto apreensaun no buska domisiliária ba sidadaun na’in-rua ho inisiál FM no ANMP iha rezidénsia Kamea no Motael, tanba alegadamente nu’udár dirijente másimu ICCTL.
Mário hatutan depoizde PCIC halo identifikasaun ba sidadaun referida, PCIC haruka fila bá uma tanba foin iha faze identifikasaun.
Aleinde ne’e, Portavóz PCIC ne’e informa PCIC konsege hetan ID balun iha facebook ne’ebé mak bele sai hanesan mind stream (autór) husi atividade sira-ne’e.
“Ami identifika sidadaun ida ho inisiál NB tanba nia mak uza ID tolu hodi suporta atividade referida liuhusi mídia sosiál,” nia haktuir.
Tavares mós hateten PCIC mós simu keixa sidadaun na’in-rua nian liga ho sira-nia envolvimentu iha organizasaun ICCTL. Sidadaun na’in-rua ne’e presta deklarasaun iha PCIC tanba sente sai vítima bainhira hola-parte iha ICCTL.
Rekorda fali katak iha sesta (11/4), PCIC ezekuta mandadu Tribunál hodi halo auto apreensaun no buska domisiliária ba sidadaun na’in-rua ho inisiál FM no ANMP iha rezidénsia Kamea no Motael.
Iha atividade auto apreensaun no buska domisiliária ne’e, PCIC halo apreensaun ba kazula no dokumentu sira-ne’ebé sidadaun hirak-ne’e uza hodi hala’o atividade ICCTL, nune’e PCIC lori sidadaun na’in-rua ne’e bá edifísiu PCIC hodi submete ba prosesu identifikasaun.
Jornalista: Natalino Costa
Editór: Xisto Freitas da Piedade
