Autoridade RAEOA oferese nesesidade bázika ba abitante Naktuka

Autoridade Rejiaun Administrativa Espesiál Oekusi Ambeno (RAEOA), lideradu Rogério Tiago Lobato, kuarta ohin apoia hela foos saka 70 ba abitante sira iha bairru Naktuka aldeia Manán suku Bene-Ufe sub-rejiaun Nítibe. Foto Tatoli,I.P/Abílio Elo Nini

OEKUSI, 16 Abríl 2025 (TATOLI)– Autoridade Rejiaun Administrativa Espesiál Oekusi Ambeno (RAEOA), lideradu Rogério Tiago Lobato, kuarta ohin, oferese hela foos saka 70 ba abitante sira iha bairru Naktuka, aldeia Manán, suku Bene-Ufe, sub-rejiaun Nítibe.

Prezidente Autoridade RAEOA, Rogério Tiago Lobato, hateten katak apoia ne’e importante tanba durante ne’e iha informasaun katak rai Naktuka hetan ameasa, nune’e autoridade lori hela apoia ne’e, atu ko’alia ho komunidade atu fó fiar ba Governu hodi buka solusaun ba fronteira Naktuka.

Autoridade Rejiaun Administrativa Espesiál Oekusi Ambeno (RAEOA), lideradu Rogério Tiago Lobato, kuarta ohin apoia hela foos saka 70 ba abitante sira iha bairru Naktuka aldeia Manán suku Bene-Ufe sub-rejiaun Nítibe.
Foto Tatoli,I.P/Abílio Elo Nini

Notísia relevante:Governu responde preokupasaun opozisaun kona-ba kestaun Naktuka

“Ida-ne’e nesesidade bázika hanean foos, ohin ami lori fó ba sira tanba ita kuandu fó ne’e liuliu sira-ne’ebé laiha ona forsa atu halo servisu. Tanba ne’e ita fó ba sira, nune’e sira bele utiliza ba nesesidade família. Ita mós enkoraja sira atu kontinua hala’o sira-nia servisu, labele rona ema seluk atu mai lohi sira, maibé fiar ba maun Bo’ot Xanana mak bele rezolve rai Naktuka ne’e” nia hateten iha Naktuka, ohin.

Iha biban ne’e, abitante Matias Baqui, hato’o agradese maske apoia ne’e oituan, maibé sufisiénte atu uza ba nesesidade família.

“Ami iha ne’e do’ok dalaruma bo’ot sira haluha ami, maibé ohin ami kontente tanba Prezidente Autoridade ho estrutura tomak mai haree ami, lori mós hahán, ida-ne’e ami laiha buat ida ami só agradese, tanba durante ne’e ema mai bosok ami dehan atu hasai ami husi fatin ne’e, maibe ami agradese ba ukun na’in-sira, husu atu haree nafatin ami,” nia orgullu.

Jornalista Tatoli,I.P, observa durante prezensa autoridade RAEOA iha Naktuka, promove mós dialogu, hala’o diskusaun kona-ba polemika rai Naktuka no husu komunidade kontinua hala’o servisu no fó konfiánsa ba Governu lideradu Primeiru-Ministru, Kay Rala Xanana Gusmão, hodi rezolve ho nasaun viziñu. Enkuantu, totál populasaun iha bairru Naktuka hamutuk 200-resin husi uma-kain 78

Notísia relevante: Autoridade RAEOA rega adubu orgániku ba natar ektare 77 iha Naktuka

Jornalista: Abílio Elo Nini

Editór: Florencio Miranda Ximenes