BOBONARU, 16 Abríl 2025 (TATOLI)—Benefisiáriu sira iha aldeia Tunubibi, suku Tapo-Memo, postu administrativu Maliana, munisípiu Bobonaru sente haksolok ho Programa Uma Dignu ba Povu ne’ebé implementa husi Ministériu Dezenbolvimentu Rurál no Habitasaun Komunitária.
Notísia Relevante: Assanami: uma dignu ba povu iha faze implementasaun
Projetu Uma Dignu ba Povu iha aldeia Tunubibi ho totál uma unidade 25 ne’ebé hahú konstrui iha fulan-Dezembru tinan 2024.
“Ita-nia Governu nia programa, planu ami povu simu ho haksolok tanba Gvernu ajuda Povu kbi’it La’ek forsa laiha, hodi harii uma dignu ida hanesan ne’e ami kontente. Kona-bá atu selu mós ba ami povu laiha buat ida, tanba dezenvolvimentu atu la’o tenke-ser iha taxa ruma,. Osan husu povu ba fali Estadu, husi estádu ba fali povu,” Benifisiáriu Luis López informa ba jornalista sira iha Tunubibi, kuarta ne’e.
Nia observa materiál ne’ebé utiliza iha obra ne’e hanesan besi no panél kualidade di’ak no la han tempu tanba monta fasíl tebes, maibé nia husu kompañia atu aselera projetu nune’e bele finaliza tuir tempu.
“Panél ida-ne’e, ami sente kapaas la halimar tanba uma ida monta loron tolu de’it hotu ona. Se ita uza bahan sira hanesan Beton fui sinta iha leten han tempu barak-liu. Ágora ami presiza mak servisu tenke aselera tanba ida atu mai tan ne’e sei iha. Sira barak mak seidauk hetan ne’e bele hetan hotu sira-nia direitu,” nia dehan,
Hanesan komunidade ho kapasidade ekonomía natoon, Luis López sente uma ne’e dignu duni ba Povu atu hela tanba espasu luan no luxu.
“Ita haree kondisaun uma mós jetu loos, depois nia medida 13x 9,80m ,iha laran kuartu ha’at,kuartu ida medida 3×10,entaun familia iha uma laran bele na’in tolu ha’at,tanba luan no seguru “Nia katak
Xefe aldeia Tunubibi, Adriano Soares, agradese no sente orgullu tanba Governu bele hili aldeia Tunubibi hodi implementa programa ne’ebé tuir planu sei konstrui uma to’o unidade 150. Aleinde ne’e, apoia mós grupu hakiak Manu-Rade, Ikan halo atividade ortikultura inklui programa Bairu Matak ne’ebé foin iha faze atu implementa.
Adriano argumenta, programa ne’e bele responde ona povu nia preokupasaun no lori morís di’ak ba povu.
“Ami haree programa ne’e kapaas tebes tanba sira mai implementa ne’e la hare ba sé deit, nia la haree A ou B, hanesan komunidade hetan hotu,” nia dehan.
Enjiñeiru kompañia Rics Unipesoál, Lda, Olandino dos Santos, esklarese progresu fiziku implementasaun obra ne’e atinje ona 20%-resin.
Enjineiru ne’e rekuñese implementasaun obra ne’e atrazu uitoan, tanba iha fulan-Janeiru to’o Marsu ne’e udan la fó biban atu estoke materiál no difikulta badaen sira atu halo servisu iha terrenu.
“Ami harii ona aliserse iha uma 18, iha hitu (7) mak ami estoke hela materiál tanba iha janeiru mai to’o Marsu ne’e iklima, udan, ne’e mak balun ami seidauk hahú. Tanba, tama fulan-Abril ne’e mak ami foin estoke materiál iha maibé peanel iha uma haat (4) mak hamriik tiha ona, uma rua (2) mak finishing ítem ida Peanel ne’e uma haat (4) mak seidauk finishing. Tanba, ami iha mudansa Peanel, ne’ebé ágora ami hatun ona Peanel tipu Cm 60 hodi kompleta uma haat (4) ne’e,” nia hateten.
Enkuantu uma Dignu unidade 25 ne’e konstrui ho orsamentu $798,762.26 ne’e, tuir kontratu sei ramata iha loron 04 Jullu 2025.
Notísia Relevante: Governu-ADB asina akordu kooperasaun hodi dezenvolve infraestrutura bee iha área rurál
Jornalista : Sergio da Cruz
Editór : Cancio Ximenes
