DILI, 16 Abríl 2025 (TATOLI)-Ministériu Edukasaun (ME), liuhusi Diresaun Nasionál Rekursu Umanu estende tan loron haat hodi simu kandidatu ba vaga ensinu sekundáriu hahú husi loron 14 too kinta, 17 Abríl.
Nia dehan ME estende tanba volume ema boot liu munisípiu sira, tanba ne’e mak estende de’it mak Dili.
“Númeru ne’ebé ita rejista ona ne’e ema hamutuk 12.862, ita-nia inan-feton iha 6.979 mane iha 5.883”, Diretór Nasionál Rekursu Umanu, João Amaral, haktuir ba TATOLI iha nia knaar fatin, Vila Verde, kuarta ne’e.
Nia hatutan: “Grupu rekrutamentu Portugés e Temas de Literatura e Cultura, ita hetan aplikante 1.242 ne’ebe kompete ba lugares hamutuk 250. Tetun, iha 265 maka aplika no kompete ba lugár 125. Inglés iha 1.145 aplikante no kompete ba 125 lugár. Melaiu hetan 85 aplikante no kompete ba lugares 75”.
Ba grupu istória, jeografia no sidadania no dezenvolvimentu sosiál iha 1.521 hodi kompete ba vaga 150. Ekonomia no m’etodu kuantitativu, sosiolojia no empreendedorizmu rejista 2823 aplikante no kompete ba vaga 100. Aplikante ba matemátika ema-822 hodi kompete ba vaga 100.
Grupu fizika no kímika rejistu aplikante 1102 ne’ebé compete ba fatin 125. Biolojia no jeolojia rejista aplikante 2460 ne’ebé kompete ba vaga 100. Teknolojia no multimedia e informátika hetan 1110 ne’ebé kompete ba 125 lugár, edukasaun fizika no desportu hetan de’it 47 aplikante ba vaga 100. Relijiau no morál aplikante 210 kompete ba vaga 75.
Nia informa kona-ba aplikasaun tuir munisípiu, 47% ka 6898 husi totál aplikante hotu-hotu, aplika husi munisípiu Dili, hafoin Baukau no Ermera iha 6.5%, Bobonaru iha 5.53%, Likisá, Vikeke, Manufahi, Ainaru no Kovalima husi 4.08% to’o 4.67% husi totál aplikante hotu.
Maske aplikante submete aplikasaun ho porsaun maka’as liu iha Dilli, 13% aplikante moris fatin iha Baukau, Ermera no Bobonaru atinje 11.20 e tal pursentu.
Aplikante bolsa kandidatu ensinu sekundáriu mai husi área estudu lisensiatura saúde, no lingua inglés hamutuk 9,80% no 9,02%, tuir-fali jestaun jerál, lingua portuguesa, biolojia, fizika no kímika.
“Ita-nia maluk ne’ebé kompete ba área estudu uituan liu maka lingua-Malaiu, istoria, no edukasaun fizika no desportu. Ita-nia aplikante maiória prefere kolokasaun munisípiu Dili hamutuk 8.583 ka 66%, hafoin Likisa, Aileu no Baukau”, nia dehan.
Maioria aplikante hela fatin iha munisípiu Dili, hamutuk 5.069 ka 39.23%, tuir-fali Ermera iha 8.08%, Baukau 7.38%, Bobonaru 6.77%, aplikante uituan liu hela fatin iha Ataúru, Lautein no Oekusi.
Nia esplika aplikante graduadu husi UNTL mak barak liu, atinji 37.53% ka 4827, hafoin UNPAZ ho 15.75% ka 2026, UNITAL iha 14.96% ka 1924
Aplikante graduadu husi universidade sira iha rai-li’ur hamutuk 510, no maiória graduadu husi universidade sira iha Indonézia ho totál 425 aplikante, tuir fali Filipina, Brazil no Kuba.
Notísia relevante: Profesór rekrutadu sei koloka bazeia ba kuadru pesoál
Jornalista : Osória Marques
Editora : Rita Almeida
