DILI, 16 Abríl 2025 (TATOLI)–Diretór Nasionál Rekursu Umanu iha Ministériu Edukasaun (ME), João Amaral, informa konklui ona pagamentu ba kargu xefia sesante sira hotu ne’ebé hanorin Ensinu Báziku Sentrál (EBC-sigla portugés) iha territóriu.
“Iha fulan-Abríl halo pagamentu hotu ona. Sira-ne’ebé mak halo ona pagamentu rihun ida-resin, ne’ebé atu dehan de’it katak kargu xefia nia ita selu hotu ona”, dehan nia ba TATOLI iha nia knar fatin Vila Verde, ohin.
Dirijente ne’e dehan hosi rihun ida-resin ne’e maihosi Ensinu Báziku (EB) husi munisípiu Likisá hamutuk 65, EB munisípiu Kovalima 104, EB Aileu 81, EB Manufahi 75, EB Bobonaru 156, EB Baukau 126, EB Ermera 146, EB Lautein 92, EB Manatutu 84 no EB Vikeke iha 109.
Nia hatutan antes ne’e fulan rua kotuk ME halo uluk pagamentu ba kargua xefia sesante ba Ensinu Sekundáriu sira iha territóriu.
João Amaral esplika ministériu halo pagamentu ho orsamentu $869,892.60 ba kargu xefia sesante hirak-ne’e.
“Kargu xefia sesante hirak-ne’e kompostu husi Ensinu Sekundáriu Tékniku Vokasionál (ESTV) hamutuk 50 ho orsamentu $178,796.60, Ensinu Sekundáriu Jerál (ESG) hamutuk 77 ho orsamentu $252,378.00, Ensinu Báziku (EB) iha Ainaro totál profesór 86 ho orsamentu $253,657.00, husi EB Dili 65 ho orsamentu $165,156.00, husi EB Ataúro 6 ho orsamentu $19,905.00”, João dehan.
Notísia relevante: ME halo ona pagamentu ba kargu xefia sesante 284
Jornalista : Osória Marques
Editora : Rita Almeida
