BAUKAU, 16 abríl 2025 (TATOLI)-Komandante Interinu Polísia Nasionál Timor-Leste husi munisipiu Baukau, Superintendente João Sancho Pires, hatete garante seguransa durante selebrasaun semana santa iha Baukau.
“Sei koloka membru sira iha kada igreja, nune’e garante pás no hakmatek liuliu misa sábadu tanba realiza iha kalan no sei partisipa másimu husi sarani-sira. Ita iha ona planu operasaun”, dehan nia iha Vila Nova, kuarta ne’e.
Membru sira ne’ebé komandu sei koloka hetan apoiu husi Batallaun Ordem Publiku (BOP) no Falintil-FDTL Komponente Terrestre. “Se de’it mak hakarak koko buat ruma iha terenu, polísia prontu atua, tanba polísia la mesak”, Superintendenti Pires akresenta.
Komandu munisípiu Baukau husu ba komunidade serbisu hamutuk ho seguransa tanba páskua mak festa sarania nia hodi komemora Jesus Kristu nia moris-hi’as hafoin kruzifikasaun.
PNTL Baukau sei destaka membru sira iha igreja hamutuk 26, kapela 49 no estasaun-sia iha postu administrativu ualu husi suku 62.
Notísia relevante: PNTL Covalima asegura másima selebrasaun misa durante semana Santa
Jornalista : Natalino Belo
Editora : Rita Almeida
