DILI, 16 Abríl 2025 (TATOLI)–Prezidente Komisaun F ne’ebé trata asuntu Saúde, Igualdade Jéneru no Inkluzaun Sosiál, Maria Gorumali Barreto, observa númeru estudante estajiáriu barak mak hala’o estájiu iha Hospital Nacional Guido Valadares (HNGV), nune’e husu ba autoridade kompetente atu kontrola ho didi’ak hodi labele afeta ba atendimentu pasiente.
Nia dehan, parte Komisaun F seidauk iha planu atu halo fiskalizasaun ba preokupasaun públiku iha loron hirak liubá iha HNGV, relasiona ho pasiente lakon vida iha sala emerjénsia.
“Komisaun observa oinsá para Ministra Saúde atu haree no rezolve asuntu ne’e, akompaña iha mídia entrevista husi portavós HNGV, rekoñese katak ne’e erru. Prosesu hotu iha erru ruma sei iha investigasaun internál, depois ita hein rezultadu investigasaun loloos, maibé Komisaun haree estajiáriu sira iha HNGV ne’e barak tebes,” Reprezentante povu ne’e hateten iha resintu PN, kuarta ne’e.
Nia haktuir, antes ne’e komisaun nia fiskalizasaun iha munisípiu Bobonaru, nota katak estajiáriu husi Institutu Siénsia Saúde (ICS, sigla portugés) ne’e barak tebes.
“Ida-ne’e mós afeta ba pesoál saúde sira ne’ebé mak serbisu iha HNGV no ospitál referál atubele kontrola no fó atendimentu. Entaun iha parte pesoál saúde bele hanesan ho sira-nia prátika, tanba sira estajiáriu, halo estájiu hodi bele apreende bele sona ema, troka soru, no kura moras kanek sira,” nia akresenta.
Notísia relevante : Opozisaun husu profisionál saúde mellora atendimentu ba pasiente iha HNGV
Deputada ne’e nota, iha problema iha rekursu umanu limitadu no estajiáriu ba hala’o estájiu, entaun pesoál saúde difísil atu kontrola.
“Ne’e ha’u nia observasaun, tanba bazeia ba Komisaun nia fiskalizasaun iha munisípiu sira no ospitál nasionál rasik, ho kondisaun ida-ne’e mak ita hein investigasaun,” nia tenik.
Komisaun F mós rekomenda ba universidade ne’ebé loke kursu medisina jerál no área saúde nian, atubele tetu ho estajiáriu sira ne’ebé haruka ba prátika no tetu ho pesoál saúde ne’ebé iha atu hala’o serbisu iha ospitál sira.
“Ho nune’e bele iha kontrola di’ak husi pesoál saúde nomós estajiáriu, maibé bainhira estajiáriu bá ho númeru boot dalaruma pesoál saúde atu haree kontrola sé. Ita rekuñese bele akontese erru bainhira sira mós laiha tempu ne’ebé atubele kontrola estajiáriu sira ne’e. Tanba ne’e, rekomenda universidade sira atu haruka estudante sira ba halo estájiu iha ospitál presiza tetu mós ho ne’e,” nia katak.
Prezidente Komisaun F dehan, estudante medisina jerál husi Universidade Nasionál Timor-Lorosa’e (UNTL) sira ba halo prátika iha ospitál sira tanba sira-nia dosente iha ne’ebá hanesan médiku espesialista ne’ebé mai husi Kuba inklui timoroan sira.
“Entaun, sira bá ne’e iha kontrolu ne’ebé di’ak tebes husi médiku espesialista sira ne’ebé mak hanorin iha UNTL fakuldade medisina jerál, ne’ebé haree diferensa mak iha ne’e, agora estajiáriu sira husi universidade sira seluk ne’e sira bá iha ne’ebá iha ema para kontrola ka la’e” Deputada husi Bankada CNRT katak.
Haree ba kestaun balun ne’ebé akontese maka Komisaun F sei haree asuntu ne’e no sei presiza halo diskusaun ho Ministériu Saúde inklui dirijente sira iha ospitál hodi bele akumula informasaun sira.
“Hafoin bolu universidade sira mós presiza rona hodi ita haree ba oin ne’e labele ba ho montante boot depois balun prátika no balun lae. Ida-ne’e mós sai hanesan obstákulu boot ami observa hela situasaun iha HNGV fó tempu ba Ministériu Saúde atu rezolve tanba iha Ministra no Vise-Ministru na’in-rua. Ami komisaun hala’o observa lai, depois Komisaun hala’o nia fiskalizasaun kuandu ami haree iha nesesáriu duni,” Deputada tenik.
Nia apela ba profisionál saúde atu fó atendimentu ba pasiente ho domin no fuan atu nune’e bele dada pasiente sira sente iha tratamentu ne’ebé familiár no di’ak hodi sira sente pesoál saúde inklui bele konfortável asesu ba tratamentu.
“Ita-nia vida ne’e depende ba sira ne’ebé serbisu iha saúde ne’e, trata ema nia vida presiza kuidadu, liuliu pesoál saúde tenke serbí ho fuan, tanba imi-nia profisaun mak ida-ne’e duni,” Prezidente Komisaun F fó hanoin.
Jornalista : Nelson de Sousa
Editora : Julia Chatarina
