BOBONARU, 16 Abril 2025 (TATOLI)—Diresaun Servisu Konservatóriu Rejistu Notariadu (DKSRN) munisípiu Bobonaru iha trimestre dahuluk tinan 2025 ne’e, rekolla reseita hamutuk $43,525 hodi kontribui ba kofre Estadu.
Diretór Diresaun Servisu Konservatóriu Rejistu Notariadu (DKSRN) munisípiu Bobonaru, Marciano Mali Loe, esplika reseita hirak ne’e halibur liuhusi atendimentu pasaporte komum Timor-Leste nian.
Notísia Relevante: Notariadu Bobonaro atende pasaporte 20 kada loron
“Iha Janeiru to’o Marsu ita-nia sidadaun ne’ebé trata pasaporte hamutuk na’in-816, mane hamutuk 528 no feto hamutuk 288 ho nia orsamentu hamutuk $43,525 ne’e, konkorre ba sidadaun sira-ne’ebé trata pasaporte ho osan $100, $75 no $50,” Nia informa ba jornalista sira iha kna’ar fatin, kuarta ne’e.
Diretór Marciano konfirma, daudaun ne’e atendimentu pasaporte sei kontinua depende ba oráriu husi Diresaun Jerál Konservatóriu Rejistu Notariadu tanba problema mákina CISCO avaria.
“Ita agora oráriu ne’e permanente ida. Ezemplu oráriu ne’e ita fahe ba grupu tolu, ita hamutuk ho Oé-Cuse, Ermera no Líkisa ita grupu ida. Ezemplu, horisehik ita atendimentu ne’e ita loron ida, depois ba fali parte rai-klaran oráriu la hanesan,” nia dehan.
Nia dehan, bainhira sistema CISCO foun rúa to’o ona Diresaun jerál atendimentu iha DKSRN Munisípiu Bobonaru mós kontinua la’o normál tuir oras servisu.
Prosesu atendimentu babain sidadaun ne’ebé trata pasaporte ba loron ida $100 nia no loron tolu $75, operadór sistema prosesu depois sidadaun ne’e rasik ba selu iha Banku Nasionál Komérsiu Timor-Leste (BNCTL), hafoin ekipa DSKRN Munisípiu Bobonaru entrega resivu ho dukumentu kompletu, na’in mak ba foti rasik iha Dili bazeia ba loron ne’ebé sira selu.
Enkuantu ba ba prosesu normál loron 10 ho valór osan $50 nian, operadór sistema sira mak ba foti iha Dili, hafoin na’in mai foti iha edifisíu DKSRN Munisípiu Bobonaru tuir loron ne’ebé determina.
Notísia Relevante: Atendimentu pasaporte iha Bobonaro sei hala’o iha kada kuarta
Jornalista : Sergio da Cruz
Editór : Cancio Ximenes
