DILI, 17 Abríl 2025 (TATOLI) – Arsebispu Arkidioseze Metropolitana Dioseze Dili, Dom Virgílio do Carmo da Silva, husu sarani Katólika iha Timor laran tomak atu fiar metin ka lalika nakdoko.
Iha Timor-Leste maioria sarani Katólika maibé dezde ukun rasik aan to’o agora iha seita oioin mak tama no sai no timoroan barak mós sai no tama iha seita hirak ne’e, durante tempu naruk.
“Ha’u hanoin primeiru iha tempu Páskua nian, hanesan momentu ida renovasaun, momentu ida hanesan ita tuir semana santa, hanoin kona-ba selebrasaun tuir prosesu Páskua”, amu bispu ne’e hatete, iha Kámara ekleziástika Lecidere, Dili, ohin.
Na’i-lulik mós hateten, iha tempu Kuarezma liuhusi Páskua ida-ne’e sai mós momentu purifikasaun ba ita sarani sira-nia fiar, liuhusi akontesimentu hotu ne’ebé ita liu, dalabarak ne’e dezafia ita sarani idaidak ninia fiar.
“Doko uitoan sarani sira-nia fiar. Maibé, hela fila-fali ba sarani idaidak mak tenke hamriik-metin atu la tuir arbiru saida de’it mak ema oioin, doutrina oioin, fiar oioin mai”.
Maibé, tuir Dom. Virgílio, ema konvida fila-fali sarani sira iha tempu Páskua ita tenke selebra ita-nia Páskua didi’ak, hodi reza, halo viasakra depois ida-ne’e sai momentu ba ita atu hametin liután ita-nia fiar.
“Ne’e, duni ida-ne’e mak laloran sira-ne’ebé kontinua. Esperiénsia ita-nia moris nu’udar igreja, hanoin ita-nia igreja, kuazé iha tempu naruk ita-nia igreja iha buat barak. No, ha’u fiar katak sarani idaidak hatene ninia fiar, no hadomi nia fiar”, nia konsidera.
Dom. Virgílio do Carmo Kardeál da Silva Nia esplika, iha meiu ida-ne’e ida-idak hatene-nia fiar, sarani ida-idak hadomi nia fiar no fiar katak sarani iha nia liberdade tomak, atu hatene ko’alia, hatene defende, hatene hamriik iha oin hodi prátika nafatin fiar ne’ebé nia iha dezde bainhira simu batizmu husi ki’ik to’o agora.
“Tanba prosesu ida atu harii irarkia igreja, sai hanesan Jezus nia manu-ain no uza batina la’ós fasil no lalais. Maibé, ida-ne’e sempre liuhusi prosesu ne’ebé mak naruk no hetan legalidade ordenamentu”, nia esplika
Amu kardeál hato’o mensajen, “kontinua konvida sarani sira iha semana Santa, tanba Páskua mai ita ne’e atu prepara aan; atu Páskua bele purifika, hametin liután sarani nia fiar iha situasaun sira hanesan ne’e”.
Notísia relevante:Aproveita momentu semana santa ho fiar, moos no haraik aan – Dom Virgílio do Carmo
Jornalista: Alexandra da Costa Santos
Editór: Rafael Ximenes de A. Belo
