DILI, 16 Abríl 2025 (TATOLI)-Prezidente Konsellu Administrasaun Institutu Nasionál Seguransa Sosiál (INSS), Arlindo Pinto, husu ba empregadór sira atu rekere dadus traballadór hodi asesu ba mobile APP.
“Atu hetan kartaun hodi asesu ba mobile APP ne’e, kuandu traballadór ne’e rekere ona iha sistema seguransa sosiál, depois traballadór la’ós ida-ida ba rekere nia dokumentu iha sistema seguransa sosiál maibé empregadór nia rekursu umanu mak rekere”, Prezidente Konsellu Administrasaun INSS hatete iha estudiu TATOLI.I,P.
Nia hatutan: “kuandu dadus kompletu ona iha sistema seguransa sosiál fulan-fulan empregadór tenke entrega. Ita bele atribui ona kartaun seguransa sosiál”.
To’o agora 161.000 ne’ebé rejistu ona seguransa sosiál ne’ebé seidauk asesu ba kartaun ne’e no husi númeru ne’e INSS atribui ona 20.000 ba traballadór sira.
Nia dehan seguransa sosiál halo levantamentu desde kontribuisaun 2017 to’o 2022, ho kapitál miliaun $150, neʼebé konsentra iha Banku Sentrál.
Depois iha tinan 2023, nia esplika, levantamentu husi Fundu Rezerva Seguransa Sosiál mai iha konta propria Fundu Rezerva Seguransa Sosiál nian ne’ebé durante aplika iha merkadu finanseiru, ne’ebé husi kapitál miliaun $150, agora ne’e foin mak halo tinan ida ho balun, aumenta millaun $254.
Kapitál Fundu Rezerva Seguransa Sosiál fizikamente, agora iha movimentu merkadu finanseiru hamutuk miliaun $233, ne’ebé durante ne’e aplika iha depozita prazu. Reseita provizóriu entre miliaun $100 too miliaun $12 kada tinan. Ida-ne’e planu atu uza hodi halo jestaun ativu ba Fundu Rezerva Seguransa Sosiál hodi halo investimentu iha rai-laran no esteriór.
Notísia relevante: INSS lansa mobile APP
Jornalista : Osória Marques
Editora : Rita Almeida
