DILI, 17 Abríl 2025 (TATOLI) – Selebrasaun kinta-feira Santa nu’udar loron ne’ebé sarani sira hafoun aan liuhusi mandamentu foun ne’ebé Jesus husik hela ba sarani sira, liuhusi nia terus no mate iha krús.
Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten iha nia omília iha misa Santa ne’e.
Dom Virgílio dehan iha kinta-feira Santa fó hanoin ba sarani sira katak iha semana ida-ne’e, liuliu loron tolu molok tama ba iha festa Páskua, hahú ho tridun.
Nia haktuir liturjia ohin nian fó hanoin buat tolu importante tebes mak eukaristia, ministériu saserdotál amu-lulik no domin komuñaun komunidade ne’ebé hamriik metin iha Kristu.
Hodi hatutan katak iha eukaristia mak memória Kristu nia terus, mate, resurreisaun no Nia fila hikas mai.
“Iha selebra misa hanoin nafatin ida-ne’e. Ne’e mak bolu panketi ba komunidade sarani iha ne’ebé kada domingu halibur hamutuk hanesan Jesus rasik dehan halo ida-ne’e hodi hanoin ha’u”.
“Ida-ne’e ita bele dehan mandatu ida ne’ebé Jesus husik hela mai ita, atu ita halo hodi hanoin Nia. Xamamentu ida ita bele dehan kontinua la’ós halo dala-ida hotu ona dezde tinan rihun rua liubá kontinua bolu atu sarani sira halibur nu’udar Maromak nia povu”, arsebispu hato’o.
Nia hatutan iha kalan ikus nian Jesus fó mandamentu hanesan “Ha’u hadomi imi, nune’e mós imi sei hadomi malu. Ema sei hatene katak imi ha’u-nia eskolante. Bainhira imi hadomi malu mak sei fó sasin kona-ba ha’u”.
Dom Virgílio salienta katak domin fraternu mak bele dehan katak iha maun-alin kristaun nia domin mak sinál vijivel, katak labele subar. Tanba sinál ne’e hatudu Maromak nia domin ne’ebé labele subar, maibé oinsá hatudu iha família, serbisu fatin no iha komunidade.
“Bainhira iha han kalan ikus nian Jesus fase nia eskolante sira-nia ain no tur hamutuk ho sira iha momentu furak ida ne’ebé nia husik hela lembransa furak ne’ebé depoizde tinan rihun rua liubá ita kontinua hanoin”.
Nia haktuir iha han kalan ikus nian Jesus kaer paun fahe ba nia eskolante sira dehan “ne’e ha’u-nia isin simu ba no foti kalis hodi dehan ne’e kalis ha’u raan nian, raan aliansa foun no rohan-la’ek nian. Ida-ne’e konvida ita atu hafoun aliansa ida-ne’e, tanba nia sakrifika nia aan ba ema hotu hodi mate iha krús”, arsebispu hateten.
Notísia relevante: Selebra Páskoa, “Moris pasiénsia tuir idaidak nia fiar”
Jornalista: Arminda Fonseca
Editora: Maria Auxiliadora
