KOVALIMA, 18 Abríl 2025 (TATOLI) – Autoridade seguransa liuhusi Komandu Polísia Nasionál Timor-Leste (PNTL), munisípiu Kovalima, koloka ona seguransa hodi buka tuir autór ne’ebé kesi tali fiu iha auto-estrada hodi difikulta movimentu transporte públiku no privadu.
Komandate PNTL Munisípiu Kovalima, Superintendente Inacio Amaral rekoñese, sidadaun feto ida ho nia oan viajen husi Suai ba iha Zumalai, bainhira to’o, iha aldeia Aidantuik suku Beco, postu Suai, ema deskonesidu dada tali fiu iha auto-estrada.
Sidadaun feto ne’e hetan ema deskoñesidu dada tali, iha loron 17 Abríl maizumenus iha tuku 11:30 bainhira ho nia oan viajen husi Suai ba postu Zumalai husi dook nune’e nia rasik hamenus velosidade hodi kontrola, maibé tali konsege ka’it nia oan nia kakorok sira na’in rua para no nia rasik halo gravasaun hodi públika mídia sosiál Facebook no viraliza.
“Hafoin minutu balun PNTL husi parte Beco ba iha terrenu identifika ema deskoñesidu dada tali fiu nune’e Ofisiál Polísia Suku (OPS) kontaktu ba eskuadra Zumalai hodi kontinua kontaktu mai iha komandu PNTL Kovalima, ita orienta kedas ekipa hamutuk ho Polísia BOP ba iha fatin akontesimentu buka tuir autór”, Superintendente Inacio Amaral informa ba TATOLI hafoin misa, iha resintu Igreja Ave Maria Suai, ohin
Ho akontesimente ne’e, atu halo prevensaun , PNTL komunika ho lideransa komunitária hodi ko’alia ba komunidade sira atu fó hanoin ba nia oan sira atu labele repete aktu referidu atu estraga ema seluk nia vida no hasa’e volume patrullamentu ho motorizada no karreta nune’e atu evita aktu referidu.
“Komandu mós koloka ona seguransa buka informasaun hodi buka autór, bainhira ita identifika, prosesu nia tuir andamentu Ministériu Públiku ( MP)”, nia dehan.
Notísia relevante: Komandu PNTL Kovalima halo inspesaun ba motorizada OPS 30
Jornalista:Celestina Teles
Editór: Rafael Ximenes de A Belo
