DILI, 19 Abríl 2025 (TATOLI)- Reitór Universidade Orientál Timor Lorosa’e (UNITAL), Claudino Ninas Nabais, relata maske seidauk hatama proposta, maibe simu ona karta husi Ministériu Ensinu Superiór Siénsia no Kultura katak iha tinan ne’e, kuaje hetan subvensaun públiku rihun $105.
“Ami seidauk hatama proposta kona-ba subvensaun públiku, maibé ami hetan ona karta ida husi Ministériu Ensinu Superiór Siénsia no Kultura, ne’ebé hatete katak ami hetan osan ba tinan ne’e kuaze rihun $105. UNITAL seidauk submete relatóriu ba MESSK tanba semana ne’e sei semana-santa”, nia dehan ba TATOLI,I.P nia kna’ar fatin-Bekora, ohin.
MESSK fó osan ida-ne’e no mesiona kedas osan ida ne’e la uza ba buat seluk maibé uza ba parte tolu de’it, mak kapasitasaun estudante ka hasa’e kualidade estudante sira nian, kapasitasaun dosente sira no peskiza, inklui semináriu sira.
Iha tinan kotuk UNITAL proposta asesu ba subvensaun públika ba universidade nian ho totál kuaze millaun $4,7, maibe UNITAL tama kategoria maiór nune’e hetan rihun $320.
“Distribuisaun subvensaun públika bazeia ba kategoria totál estudante ativa kada universidade sira, UNITAL tama universidade maiór tebes ho estudante liu rihun 10 entaun avalisaun husi ensinu superiór iha universidade tolu mak kategoria maiór mak UNTL, UNPAZ no UNITAL”, nia informa.
Enkuantu osan subvensaun públiku tinan kotuk UNITAL konsege ezekuta atinje pursentu 98.
“Subvensaun públiku tinan kotuk ami ezekuta ho di’ak tebes ne’ebé kompara ho universidade sira seluk, ami ezekuta de’it 98%. Maibé iha universidade haat ka lima, ida mak konsege ezekuta 100%”, nia dehan.
Nia dehan osan subvesaunn públiku tinan kotuk mak UNITAL halo konstusaun fatin prátika, kampu ne’ebé kompleta ba ekipamentu laboratóriu ba fakuldade enjenária, agrikultura no fakuldade sira seluk ne’ebé presiza ekipamentu laboratóriu. Halo semináriu ba lingua portuges.
Estudante ativa iha UNITAL hamutuk 6.711 no dosente maestradu 88 no dosente doutoramentu iha na’in-9. Daudaun doutoramentu na’in 32 mak iha prosesu estudu nia laran no tinan ne’e bele finaliza ona sira-nia estudu.
Antes ne’e, Ministru Ensinu Superiór Siénsia no Kultura (MESSK), José Honório da Costa Pereira Jerónimo, afirma ba Institutu Ensinu Superior (IES) iha territóriu ba tinan ida-ne’e sei foka de’it pontu importante tolu, mak minimiza propina estudante, tulun dosente sira no fó formasaun língua.
Jornalista: Osória Marques
Editór: Florencio Miranda Ximenes
