ANKARA, 19 Abríl 2025 (TATOLI) – Profisionál komunikasaun sosiál oioin husi Estadu-Membru Asosiasaun Nasaun Sudeste Aziátiku (ASEAN) no Timor-Leste konklui Programa Formasaun kona-ba Rede Sosiál no Jornalizmu Dijitál ba Jornalista, husi loron 14 to’o 18 fulan ne’e, iha Ankara, Turkia.
Inisiativa ne’e organiza husi Ajénsia Kooperasaun no Koordenasaun Turkia (TiKA) kolabora ho Rádiu no Televizaun Turkia (TRT) no parseria ho Sekretariadu ASEAN. Eventu ne’e reflete ba kompromisu Governu Turkia nian hodi kontribui ba dezenvolvimentu rejiaun sudeste aziátiku no promove relasaun ida ne’ebé besik liután ho Estadu-Membru iha rejiaun liuhusi esforsu kolaborativu sira iha meiu komunikasaun sosiál.
Programa ne’e ho objetivu atu hametin relasaun entre profisionál sira iha órgaun komunikasaun sosiál no hadi’ak kompeténsia jornalístika país ASEAN no iha rejiaun, liuhusi formasaun komprensivu oinsá atu utiliza ferramenta dijitál iha tendénsia jornalizmu atuál.
Iha ámbitu atribuisaun sertifikadu, Diretora Formasaun no Investigasaun TRT, Selin Burcu, hateten katak “eventu ne’e hanesan inísiu husi kapítulu foun no determinante hodi kontribui ba hametin kooperasaun iha setór komunikasaun sosiál ho nasaun sira iha ASEAN no Timor-Leste”.
Tuir dirijente ne’e, inisiativa ne’e “reflete vizaun komún hodi kontribui ba komunidade ne’ebé informada, tanba komunikasaun dijitál no reportajen asume papél importante iha kooperasaun rejionál no global”.
Nune’e mos, Xefe Departamentu Relasaun Esterna no Parseria husi TiKA, Uğur Tanyeli, hatete Governu Turkia ho ksolok fó apoiu ba dezenvolvimentu meiu komunkasaun sosiál iha ASEAN no Timor-Leste. “Komunikasaun mak baze kompreensaun mútua, no liuhusi inisitiva sira hanesan ne’e, ita-nia kooperasaun sei metin liután iha futuru”, subliña.
Lembra katak partisipa iha formasaun profisionál komunikasaun sosiál Indonézia, Malázia, Brunei Darussalam, Kamboja, Myanmar, Laos, Filipina, Tailándia no Timor-Leste.
Turkia kompromete reforsa parseria ho ASEAN no Timor-Leste
Desde 2017, Governu turku, liuhusi nia ajénsia kooperasaun TiKA, impelementa ona projetu oioin iha ASEAN iha setór edukasaun, agrikultura, formasaun diplomátika no inovasaun teknolójika no seluk tan.
Deklarasaun ne’e hato’o husi Xefe Departamentu Finansa ba organizasaun multilateral, Ministériu Negósiu Estranjeiru no Kooperasaun Turkia, Şükrüye Bayar, bainhira halo enkontru ho profisionál komunikasaun sosial ASEAN no Timor-Leste, iha gabinete TiKA.
Governante ne’e informa, iha tinan ne’e, sei implementa projetu 14 tantu iha Turkia komu iha país ASEAN iha área sira hanesan agrikultura, formasaun diplomátika, polisiál, no meiu komunikasaun sosiál.
“Ami halo kontaktu ho ami-nia parseiru sira, ho Sekretariadu ASEAN no mós ami-nia embaixada iha Estadu-Membru organizasaun atu bele tuur hamutuk no diskute área prioridade ne’ebé sei implementa, tanba ami mak sai hanesan parseiru dezenvolvimentu setoriál”, nia esplika.
Kona-ba projetu hirak ne’ebé TiKA implementa ona iha Timor-Leste, Xefe Departamentu Relasaun Esterna no Parseria husi TiKA, Uğur Tanyeli, informa katak, ezemplu, iha tinan kotuk, ajénsia ne’e realiza ona projetu dahuluk, liuhusi fó apoiu ba hadi’a instalasaun Jardín Ensinu Izlámiku An-Najah (JEIAN) iha Dili. Projetu ne’e inklui halo espansaun edifísiu no fornesimentu ekipamentu nenesáriu ba saladeaula nian.
Dirijente ne’e hatete inisiativa ne’e reflete ba kompromisu Turkia nian hodi kontribui ba dezenvolvimentu Timor-Leste no hametin relasaun diplomátika.
Notísia relevante: Profisionál komunikasaun sosiál ASEAN no Timor-Leste tuir formasaun iha Turkia
Jornalista: Afonso do Rosário
Editora: Maria Auxiliadora
