DILI, 21 Abríl 2025 (TATOLI)-Papa Francisco iis kotu iha segunda, (21 Abríl 2025) ne’e, ho idade 88.
Novidade triste ne’e anúnsiu husi Sua Eminénsia, Kardeál Camerlengo Farrel husi Casa Santa Marta.
Tuir notísia husi Vatikanu ne’ebé TATOLI sita haktuir, Papa Francisco hakotu iis iha tuku 7.35 oras Vatikanu-nian. Signifika, Papa Francisco hakotu iis tuku 14.35 oras Timor-nian, ohin.
“Iha tuku 7:35 ohin dadeer, Bispu Roma nian, Francisco, fila hikas ba Padre nia uma. Ninia moris tomak dedika ba servisu Na’i nian no Kreda nian”, anúnsiu Kardeál Farrel.
Iha Kardeál Farrel nia anúnsiu, hatete : “Nia (Papa Francisco) hanorin ita atu moris valór sira Evanjellu nian ho fidelidade, aten-brani no domin universál, liuliu iha favór ba sira ne’ebé kiak liu no marjinalizadu liu”.
Notísia relevante: Koñese Papa Francisco, Líder espirituál no mundiál
“Ho agradesimentu boot ba ninia ezemplu nu’udar Na’i Jesus nia dixípulu loloos, ami hahii Papa Francisco nia klamar ba Maromak Trindade nia domin mizerikórdia rohan-laek”, katak Sua Eminénsia, Kardeál Farrel.
Notísia relevante: Vizita Papa Francisco lori grasa mai Timor-Leste
Papa Francisco mosu iha varanda Bazílika São Pedro nian iha domingu horisehik, hodi hato’o mensajen ikus Páskua Urbi et Orbi ba Kreda no mundu. TATOLI
