DILI, 22 Abríl 2025 (TATOLI)—Partidu Frente Revolucionária de Timor-Leste Indepedente (FRETILIN) sente tristeza boot tanba rona Papa Francisco hakotu ona iis.
Sekretáriu Jerál Partidu FRETILIN, Mari Alkatiri, konsidera notísia ne’e kontra FRETILIN no povu Timor-Leste nia espetativa tanba Amu Papa nia aparisaun públika iha loron Sábadu santu no domingu Páskua hametin ema-nia fiar katak maski neneik, maibé Amu Papa sei hahú asume filafali ninia kna’ar nu’udar Líder Igreja Katólika nomós kontinua fanu mundu tomak atu labele haluha ema ki’ik no ki’ak sira.
“FRETILIN sente Amu Papa Francisco nia mate reprezenta lakon boot ida ba Timor-Leste no umanidade tomak,” Alkatiri hato’o liuhusi nota ne’ebé Agência Tatoli asesu, tersa ne’e.
Alkatiri lembra, tinan kotuk durante vizita mai Timor-Leste, Amu Papa husu atu líder sira nasaun nian atu fó prioridade ba povu tomak nia moris di’ak no la’ós ba grupu ki’ik ida de’it nia di’ak.
“Labele hases no hanehan timoroan sira ne’ebé ki’ak no ki’ik atu hamosu duni justisa sosiál iha rai ida-ne’e,” nia akresenta.
Notísi relevante : Misa fúnebre Papa Francisco sei hala’o iha sábadu lorokraik iha Tasi-tolu
Durante vizita iha Timor-Leste, Amu Papa Francisco husu povu no líder sira atu promove moris di’ak ba ema hotu, justisa sosiál, unidade, pás no rekonsiliasaun, inklui tau-matan ba meiu ambiente atu jerasaun sira tuir mai bele goja.
Prezidente Partidu FRETILIN, Francisco Guterres Lú-Olo, dehan, Amu Papa Francisco nia vizita mai Timor-Leste la’ós de’it hametin liután sarani Katólika nia fé, maibé mós fó hanoin atu Timor-Leste sai duni fatin ne’ebé ema hotu bele sente ukun rasik-an, moris ho dignidade no hirak ne’ebé povu hili atu kaer ukun serbisu duni ba hasai povu husi kiak, beik no mukit tuir valór sira ne’ebé FRETILIN hatuur iha 1974.
“Amu Papa husik ita tomak iha kedas momentu ida-ne’ebé mundu hasoru dezafiu boot ba garante ema tomak nia moris di’ak. Maibé ha’u fiar katak Amu Papa Francisco nia partida sei unifika no haforsa liután povu Timor-Leste tomak atu kontinua ninia luta sira ne’ebé halo Timor-Leste sai buras liu no mundu ida-ne’ebé di’ak liu,” Lú-Olo hateten.
Iha tinan-2020, atuál Prezidente FRETILIN ne’ebé momentu ne’ebá hala’o kna’ar nu’udár Prezidente Repúblika, konvida Amu Papa Francisco mai vizita Timor-Leste, ne’ebé hetan resposta pozitivu. Maibé, tanba pandemia COVID-19, Amu Papa nia vizita adia mai tinan 2024, ne’ebé nu’udar Papa nia vizita dahuluk hafoin Timor-Leste restaura nia indepedénsia.
Papa Francisco nia vizita akontese iha loron 9-11 fulan Setembru 2024.
Jornalista : Nelson de Sousa
Editora : Julia Chatarina
