DILI, 22 Abríl 2025 (TATOLI)—Prezidente Parlamentu Nasionál (PPN), Maria Fernanda Lay, hateten, povu Timor-Leste ne’ebé maioria sarani Katólika sente triste ho falesimentu.
“Ita hotu-hotu idaidak iha sentimentu, Santu Padre mai ita hotu ba simu, agora nia mate, ita bo’ot mós sente nusa,” PPN hato’o ba Agência Tatoli, iha resintu Parlamentu Nasionál (PN), tersa ne’e.
Iha fatin hanesan, Xefe Bankada Partidu Demokrátiku (PD), Manuel Henrique Noronha, lori bankada hato’o profundu sentidu kondolénsia ba falesimentu Papa Francisco nian.
Xefe Bankada PLP, Maria Angelina Sarmento, haktuir, iha tinan kotuk fulan-Setembru Santu Padre mai vizita Timor-Leste ne’e hanesan viajen ikus ne’ebé halo ninia viajen papal iha nasaun sira.
“Ho nune’e Timor-Leste hetan Fatin espesiál ba Santu Padre, tanba vizita ida-ne’e memória ita labele haluha,” nia akresenta.
Notisia relevante : PN hasa’e bandeira meia hasta fó omenajen ba falesimentu Papa Francisco
Deputada ne’e hateten, nu’udar bankada ki’ik husi opozisaun, aseita atu PN halo sesaun solene hodi presta fó omenajen espesiál ba Santu Padre nia falesimentu.
“Ida-ne’e ami hanoin pertinente tebes tanba Timor-Leste aleinde ita hanesan país ne’ebé maioria ho Katólika, Santu Padre hanesan figura sentrál iha mundu ne’ebé la’ós de’it figura relijiozu maibé ninia jornada moris bele dehan halo revolusaun mudansa barak lala’ok klásiku sira ne’ebé Igreja Katólika iha,” nia katak.
Tuir Deputada, Papa hanesan figura sentrál no ezamplar ba relijiaun sira seluk.
“Entaun mentalidade ida revolsionáriu, ne’ebé na’in Jesus hatudu ida-ne’e mak Papa kontinua hahalok hodi halo mudansa barak ba lala’ok sira iha Igreja Katólika,” nia katak.
Aleinde Amu Papa ho inisiativa ida promove fraternidade umana relijiaun sira seluk ne’ebé maioria mós iha mundu hanesan Musulmana sira mós apresia tebes inisiativa ne’e hodi to’o iha akordu asina entre relijiaun Katólika ho Musulmana ba dokumentu fraternidade umana.
“Ida-ne’e la’ós dokumentu de’it, maibé aktu ida ne’ebé importante tebes ba nasaun hotu iha mundu atu promove solidariedade, fraternidade, pás, respeitu mútua no valor prinsípiu ne’ebé ita promove,” Deputada reforsa.
Entertantu, Órgaun soberania daruak PN, dadeer ne’e hasa’e bandeira Repúblika Demokrátika Timor-Leste (RDTL) meia hasta hodi fó imenajen falesimentu Amu Papa Francisco.
Papa Francisco hakotu iis ho idade 88, iha Segunda dadeer tuku 07:35 (oras Vatikanu), hafoin luta ho komplikasaun pneumonia iha fulan ikus ne’e.
Tuir ajenda iha reuniaun plenaria segunda ne’e ho ajenda períodu orden do dia halo aprovasaun votu pezár ba falesimentu Santu Padre Papa Francisco no realiza sesaun solene espesiál. Maibé adia fali ba loron seluk tanba sei haree ho ajenda desizaun balun husi Governu.
Jornalista : Nelson de Sousa
Editora : Julia Chatarina
