DILI, 22 Abríl 2025 (TATOLI) – Vatikanu fó sai kauza líder sarani katólika mundiál, Papa Francisco, nia mate iha loron 21 fulan-Abríl pur volta tuku 07:35 oras lokál (Roma nian), iha Casa Santa Marta.
Tuir deklarasaun, Vatikanu hasai sertidaun óbitu Papa Francisco nian iha segunda-feira kalan oras lokál, ne’ebé asina husi profesór Andrea Arcangeli, Diretór Departamentu Saúde no Ijiene Estadu Sidade Vatikanu.
Sertidaun óbitu ne’e indika katak Papa, ne’ebé hakotu iis ho idade 88, mate tanba derrame serebrál, koma no kardiorrespiratória mak para.
Vatikanu informa mós katak, iha dadeer (loron 22) sei halo Kongregasaun Jerál kardeál sira ba dahuluk, iha ne’ebé sei define eventuál data ba funerál Santu Padre nia isin mate.
Lembra katak Papa Francisco, antes ne’e, moras no internadu durante loron 38 iha Ospitál Gemelli (hahú iha 14 Fevereiru no alta iha 23 Marsu), tanba sofre pneumonia bilaterál.
Papa ne’ebé moris iha Arjentina iha tinan 1936 ne’e sofre problema saúde oioin no iha tinan 2023 afeta ho infesaun respiratória no halo operasaun ba kabun hodi hasai érnia.
Notísia relevante: Papa Francisco iis kotu
TATOLI
