DILI, 23 Abríl 2025 (TATOLI)—Diretór Asosiasaun HAK, Feliciano da Costa Araújo, rekomenda ba Prezidente Repúblika (PR) atu rona parte relevante sira-nia hanoin molok fihir figura Prezidente Tribunál Rekursu (PTR) foun.
“Ita fó kompeténsia ba Prezidente, maibé husi parte sosiedade sivíl hakarak rekomenda atu Prezidente labele deside tuir ninia hanoin mesak, ita iha akademista direitu ne’e lubun boot no inteletuál sira ne’ebé hatene atubele fó konsellu molok deside, nune’e bele garante transparánsia no akontabilidade iha desizaun Tribunál rasik,” nia hato’o iha edifísiu HAK, Farol, Kuarta ne’e.
Notísia relevante : PN aprova alterasaun Lei Organizasaun Judisiária iha finál globál
Aleinde ne’e, Feliciano da Costa husu atu nomeasaun ne’e labele iha intervensaun polítika.
“Sosiedade hotu hatene, ita-nia polémika mak ema ida bá tuur iha ne’ebá tanba partidu ne’e mak ukun mak tau para labele prosesa, ita troka filafali ema iha ne’ebá atu defende nafatin ita-nia tanba ita mak ukun, ida-ne’e mak labele di’ak liu evita para ita garante duni justisa ba ema hotu,” nia akresenta.
Diretór Asosiasaun observa, kazu lubun ida hanesan Bernado, ne’ebé mak tinan hirak nia laran ona nia inan tanis no halerik ba justisa maibé to’o agora desizaun seidauk sai, seluk maka kazu asidente tráfegu iha zebra cross Elemloi nia desizaun oinseluk, ho kazu lubun tan.
“Ita lakoi lori intervensaun polítika tama bá Tribunál, se lae hanesan kazu Ro Haksolok to’o agora dun malu bá-mai, osan dala-rua ona mak ita gasta. Ne’ebé Prezidente presiza bolu ema hotu. Ami fiar Prezidente iha nia kapasidade atu deside, bolu ema hotu serve atu bá kaer Tribunál ne’ebá,” nia katak.
Diretór ne’e dehan, sidadaun iha direitu asesu justisa ho transparánsia no akontabilidade, katak desizaun ne’e klaru no justu ba ema hotu.
Iha semana kotuk Parlamentu Nasionál halo ona alterasaun ba lei Organizasaun Judisiária iha finál globál hodi hein promulgasaun husi PR, ne’ebé lei ne’e fó dalan ba Xefe Estadu atu halo nomeasaun PTR foun ba juís direitu ho esperiénsia serbisu tinan 20.
Mandatu PTR atuál sei ramata iha fulan Abríl ne’e nia laran.
Jornalista : Nelson de Sousa
Editora : Julia Chatarina
