DILI, 23 Abríl 2025 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, relata Komandu F-FDTL iha planu halo reforma ba veteranu ne’ebé ativu iha militár nain-80 iha ámbitu komemorasaun loron FALINTIL dala-50, iha loron 20 Agostu 2025.
Daudaun ne’e tuir baze dadus Komandu F-FDTL nian iha veteranu ativu ne’ebe sei halo funsaun iha instituisaun F-FDTL hamutuk 80.
¨ Sira ne’e ba ona reforma, maibé sira la’ós reforma de’it hanesan ne’e, maibé Estadu tenke trata sira ho di’ak. Tanba ne’e Governu liuhusi Ministru Defeza hato’o ona proposta no hetan ona aprovasaun ba Estatutu Militar, nune’e atubele dignifika veteranu sira ne’ebé ativu iha instituisaun F-FDTL¨, dehan Komandante F-FDTL ne’e ba jornalista iha Kuartél Jenerál F-FDTL Fatuhada-Dili, kuarta ohin.
Tenente Jenerál ne’e haktuir veteranu sira ne’ebé sei ativa iha instituisaun F-FDTL fahe ba klasifikasaun luta ba libertasaun nasionál, balun iha tinan 24, balun iha kontribuisaun ba luta 15 a 19, 8 a 14, no 3 a 7.
¨Lei ne’e iha ne’eba sita mós kritériu balun kona-ba sira nia direitu sira karik sira atu ba reforma no ita sei tau matan ba ida-ne’e nafatin para sira labele sente katak laiha dignifikasaun ba sira. Tanba iha lei foun ne’e hatete sira nia pensaun no saida mak sira sei halo. Prosesu administrativu ba ida-ne’e la’o hela¨, nia konklui.
Rekorda katak, iha loron 20 Marsu tinan 2024, Ministru Defeza, Pedro Klamar Fuik aprezenta proposta alterasaun ba estatutu militár hodi dignifika veteranu sira ne’ebé daudaun sei ativa iha instituisaun F-FDTL, nune’e Konsellu Ministru aseita no halo aprovasaun.
Notisia relevante:KM altera estatutu militár hodi valoriza kontribuisaun veteranu
Jornalista: Natalino Costa
Editór: Florencio Miranda Ximenes
