MAE reprezenta Governu koordena ho CET organiza serimónia omenajen ba Papa Francisco
DILI, 23 Abríl 2025 (TATOLI) – Governu dezigna Ministériu Administrasaun Estatál (MAE) atu reprezenta Governu hodi halo koordenasaun ho Konferénsia Episkopál Timorense (CET, sigla portugés), atu organiza serimónia omenajen ba Santidade Papa Francisco.
Vise-Ministru Asuntu Parlamentár, Adérito Hugo, hateten Governu koordena ho bispu dioseze Baukau, Maliana no Dili hodi halo preparasaun iha Arsebispu nia rezidénsia Lesidere, iha estátua Nossa Senhora Imaculada da Conceição nian, nomós iha Tasi Tolu, iha altár santu nian ne’ebé Papa Francisco halo misa hodi fasilita sarani sira espresa sira-nia sentimentu tristeza ba Papa ninia mate.
Nia dehan loron rua ona fiél sira konsentra iha Lesidere hodi hasa’e orasaun no ohin parte Governu sei halo vizita ofisiál hodi presta omenajen iha Lecidere. Hahú aban sei loke altár santu iha Tasi Tolu ba públiku, nune’e sarani sira vizita no hasa’e orasaun no to’o sabadu loron 26 sei iha misa iha tuku 4 loraik iha Tasi Tolu.
Parte Governu hamutuk ho dioseze daudaun halo hela preparativu sira ba misa nian. “Misa hahú tuku 4 loraik ne’e, kalkula to’o tuku 5 ita asiste kedas tranzmisaun direta ba prosesu fúnebre nian”, Adérito Hugo hateten iha Palásiu Governu, ohin.
Misa ne’e sei prezide husi Bispu Dioseze Baukau, Dom Leandro Maria Alves.
Governu apela ba populasaun tomak, no liuliu ba funsionáriu públiku sira hotu, atu durante períodu Lutu Nasionál ne’e, halibur malu loron-loron iha orasaun, hahú tuku 5 lokraik, iha Monumentu Na’in-Feto, iha Lesidere, nu’udar jestu omenajen no rekollimentu hodi hanoin hikas Papa Francisco.
Governante ne’e mós afirma katak servisu administrasaun públika nafatin la’o hanesan baibain, durante períodu Lutu Nasionál ne’e, tanba ne’e la’ós toleránsia pontu ka feriadu nasionál.
Antes ne’e, Governu dekreta ona Lutu Nasionál durante loron hitu ba falesimentu Papa Francisco. Períodu Lutu Nasionál hahú iha tuku 10 dadeer iha loron 22 no remata iha meianoite iha loron 28 Abríl.
Lembra katak Papa Francisco mate ho idade 88, iha loron 21 Abríl 2025, pur volta tuku 07h35 oras Vatikanu.
Notísia relevante: Serimónia fúnebre Papa Francisco realiza iha loron 26 Abríl
Jornalista: Arminda Fonseca
Editora: Maria Auxiliadora
