DILI, 23 Abríl 2025 (TATOLI) – Ministériu Asuntu Kombatente Libertasaun Nasionál (MAKLN) no Konsellu Kombatente Libertasaun Nasionál (CCLN, sigla portugés) rejista ona reklamasaun no kontestasaun liu rihun 42.
“Reklamasaun no kontestasaun rihun 42-resin ne’e seidauk fiksu, tanba dokumentu balun sei iha hela CCLN munisipiu sira, seidauk hatama hotu mai, foin tama hotu ne’e munisípiu Lautein no Vikeke. Bainhira mai hotu ona mak ita foin fó sai ba públiku hira mak válidu. Prosesu ba pagamentu, la’ós iha fulan ne’e, maibé sei bele to’o iha terseiru trimestre, iha tinan ne’e”, Ministu Asuntu Kombatente Libertasaun Nasionál, Gil da Costa ‘Oan Soru’ hateten iha Palásiu Governu, ohin.
Reklamasaun no kontetasaun sira seidauk submete hotu tanba, MAKLN estende atu CCLN kada munisípiu kontinua simu folla reklamasaun no kontetasaun nian husi públiku ba fulan ida tan, hahú iha 18 Marsu to’o 18 Abríl.
“Maibé to’o data determinasaun iha 18 Abríl ne’e, CCLN munisípiu sira labele lori mai, tanba relasiona ho festa Páskua nian”.
Nia haktuir katak reklamasaun no kontestasaun sira ne’ebé tama barak liu mak hakarak hasa’e sira-nian grau ba 8-14 hotu.
Notísia relevante: MAKLN estende reklamasaun no kontestasaun inklui dokumentu pendente 2003
Jornalista: Arminda Fonseca
Editora: Maria Auxiliadora
