PN no Governu hahú diskute proposta lei kódigu rekuperasaun no insolvénsia
DILI, 24 Abríl 2025 (TATOLI)-Parlamentu Nasionál (PN) liuhusi Komisaun A (asuntu justisa no konstituisaun) no D (ekonomia no dezenvolvimentu) kinta ne’e, konvida entidade relevante hodi rona sira-nia hanoin relasiona ho proposta-lei númeru 12/VI (1a) kódigu rekoperasaun no insolvénsia.
Instituisaun sira ne’ebé hola-parte iha audénsia mak Ministériu Koordenadór asuntu Ekonómiku, Ministériu Finansa, Ministériu Komérsiu no Indústria, Ministériu Justisa.
“Lei ne’e pelumenus fó ona konfiansa ba sira atu investe, tanba sira hatene katak, iha ona serteza legál para sira investe no sira hatene bainhira iha problema ruma karik, lei ne’e sei regulariza sira-nia situasaun rasik”, Ministru Interiór, Francisco da Costa Guterres, bainhira reprezenta Vise Primeiru-Ministru, Ministru Koordenadór asuntu Ekonómiku no Ministru Turizmu no Ambiente, ba jornalista sira hafoin audénsia iha PN.
Ho lakuna jurídika ba dezenvolvimentu ekonómiku, nia dehan objetivu lei-ne’e fó seguransa jurídika ba setór privadu no mós investidór sira.
Governante ne’e fó exemplu, banku sira fó garantia ba setór privadu iha serteza jurídika hodi bele fó kréditu ba empreza sira hodi hetan jere finansia ba sira-nia atividade.
Nia dehan, durante rejista empreza balun la kumpre sira-nia obrigasaun, maibé kestaun jurídika ne’e mak seidauk fó oportunidade, setór finanseiru seidauk fó deve osan ba kompañia sira atu foti asaun balun hodi rekupera fali sira-nia aset.
“Lei ne’e ita bele fó serteza, garantia ba devedór no kredór ne’e rasik, katak kredór ne’e fó kréditu ba kompañia ida, se kompañia nia ne’e mak to’o iha klaran nia deklara nia-an insolvénsia labele selu ona ninia obrigasaun iha ona prosesu ida nia tama insolvénsia ne’e iha ne’ebé, iha ona órgaun ida sei konta atu halo prosesu hodi bele rezolve halo rekuperasaun ba kredór nia osan rekupera nia aset uituan ne’ebé nia fó ona ba deve, nune’e labele kria fali problema finanseiru ba nia”, nia tenik.
Ministru hateten, aleinde haree mós empreza ne’ebé tama ona insolvénsa bele halo oinsá rekuperasaun tanba de’it tama iha prosesu insolvénsia la’ós nia kulpa hodi kontinua fali atividade, maibé tenke obedese ba regra ne’ebé iha, tanba lei ne’e regula hotu.
Nune’e Governu sei harii órgaun hodi haree kestaun ne’e no Governu mai atu superviziona haree prosesu ne’e la’o loloos, garantia direitu no dever ne’ebé mak banku no devedór sira halo ne’e la’o tuir duni ka-la’e.
“Lei ne’e sei fasilita tebes, liliu investimentu, ema sente mai investe iha serteza jurídika ba nia atu investe no nia fiar bainhira fó kréditu ba ema ruma hatene sei la lakon tanba lei ida ne’e fó garantia’,’ katak nia.
Deputadu Membru Komisaun A, Duarte Nunes, apresia inisiativa husi Governu hodi aprezenta, nune’e bele proteje no asegura setór privadu halo investimentu iha rai-laran no lejislasaun ne’e parte ida atu kumpre, nu’udar membru ba Organizasaun Mundiál Komérsiu (OMK).
Entertantu, komisaun A no D sei kontinua hala’o audénsia públika ba proposta-lei ne’e ho entidade relevante seluk hodi rona mós sira-nia hanoin hafoin sei halo relatóriu no paréser ba apresiasaun inisiál hafoin diskusaun iha plenária ba faze jeneralidade, espesialidade no finál globál.
Notísia relevante: Kódigu Rekuperasaun no Insolvénsia bele proteje setór privadu hala’o investimentu
Jornalista : Nelson de Sousa
Editora : Rita Almeida
