DILI, 24 Abríl 2025 (TATOLI)—Diretora Interina Servisu Nasionál Ambulánsia no Emerjénsia Médika (SNAEM,I.P), Cesaltina Araújo Mendonça, hateten SNAEM,I.P sei apoia ambulánsia tolu ba misa requiem Papa Francisco nian iha Tasi Tolu, 26 Abríl.
“Orientasaun ne’ebé mak maihusi Ministra Saúde katak ita sei apoia ambulánsia tolu bá iha misa requiem Papa Francisco nian iha 26 Abríl, iha Tasi Tolu,” Cesaltina dehan ba TATOLI iha nia kna’ar fatin, Kaikoli, kinta ne’e.
Nia haktuir Ministra Saúde orienta apoiu ambulánsia haat, ida iha Lecidere no tolu seluk sei kolokadu iha Tasi Tolu.
Notísia relevante: Misa fúnebre Papa Francisco sei hala’o iha sábadu lorokraik iha Tasi-tolu
“Ami sei la monta tenda, maibé ambulánsia tolu konfirmadu stanby iha-ne’ebá, ho ekipa ambulánsia maizumenus ema na’in-haat hanesan motorista ida, enfermeiru rua no médiku ida,” Cesaltino informa.
Nia hatutan, sira mós sei prepara medikamentu konsumável liuliu ai-moruk esensiál sira-ne’ebé pasiente presiza liu atu atende ba iha primeiru sokoru nian.
Jornalista: Felicidade Ximenes
Editór: Xisto Freitas da Piedade
