DILI, 24 Abríl 2025 (TATOLI) – Primeiru-Ministru (PM), Xanana Gusmão, relembra Papa Francisco hanesan figura di’ak ba ema hotu, tanba iha nia viajen moris sempre hanorin ema ka sarani sira atu haree no hadomi ema hotu ne’ebé kbiit-la’ek.
Tuir Xanana, Papa Francisco nu’udar ema ida ne’ebé mundu tomak apresia, liuliu nia korajen kona-ba fraternidade umana.
“Papa ida ne’ebé sempre hakilar kona-ba funu, nia husu funu-na’in sira katak hanoin netik ema ne’ebé sofre tanba imi halo funu, maibé ema seluk mak sofre no mate”, Xanana dehan iha aeroportu Komoro, ohin.
Antes Papa Francisco mate, Xanana haktuir, nia mós ko’alia kona-ba funu iha Gaza, tanba direitu internasionál ne’e aplika de’it ba Ukraína no la ba Palestina. “Ida-ne’e tanba interese rai-boot sira-nian, sira lakohi hatene ema hira mak mate ka labarik hira mak mate”.
Nia haktuir Papa sai ezemplu ida iha igreja nia-laran, tanba nia la’ós halo de’it misa, maibé atende sosiedade nia presiza iha morál, polítika no seluk tan.
“Ita hothotu akompaña notísia serimónia Papa Francisco nian iha Bazílika São Pedro. Papa nu’udar imajen di’ak tebes ba ema hotu. Hothotu espresa foin lalais nia mai iha ne’e, atrai sarani sira partisipa misa iha Tasi Tolu liu rihun 600, mundu tomak admira”, Xanana salienta.
Primeiru-Ministru hanoin hikas Papa nia vizita mai Timor-Leste, ne’ebé hala’o atividade lubuk ida. Ba komunidade musulmana, joven sira, ba timoroan tomak, liuliu ba ukun-na’in sira, nia husu hanoin mak povu tanba povu mak rikusoin, no ba joven sira ne’ebé matenek ona no hetan osan tenke hadomi inan-aman.
“Ne’ebé ita hotu lembra nia prezensa. Tanba ne’e mak ita mós triste hamutuk ho mundu tomak triste. Ita husu ba Maromak atu nia bele hetan fatin tuur iha Maromak nia kadunan, atu tau-matan nafatin mai ita no rai hotu ne’ebé agora sei funu”, dehan.
Xefe Governu mós relata katak bainhira notísia kona-ba Papa Francisco mate, nia rasik sei iha Melbourne-Austrália mak Prezidente Repúblika, José Ramos Horta, telefone hodi fó hatene.
Maski Xefe Ezekutivu laiha Timor-Leste, maibé Governu iha Dili hasai rezolusaun hodi dekreta lutu nasionál durante loron hitu no hasa’e bandeira to’o riin-klaran.
“Ita hothotu hatene katak kuandu akontese hanesan ne’e tenke asina iha dokumentu kondolénsia kona-ba Papa nia mate no entrega ba Santa Sé. Maibé ha’u foin to’o, maski la marka prezensa maibé membru Governu sira, deputadu no sarani sira iha ne’e asina ona no lori bá ona”, Xanana Gusmão konklui.
Papa Francisco ho naran Jorge Mario Bergoglio hakotu iis ho idade 88 iha loron 21 Abríl iha nia rezidénsia Casa Santa Marta, iha Roma.
Notísia relevante: Taur Matan Ruak: Santu Padre nia mate reprezenta lakon boot ba kreda Katólika
Jornalista: Arminda Fonseca
Editora: Maria Auxiliadora
