DILI, 25 Abríl 2025 (TATOLI) – Superientendente Xefe Komandante Polísia Nasionál Timor-Leste (PNTL) Munsípiu Dili, Orlando Gomes klarifika katak informasaun ne’ebé espalla iha públiku kona-ba taka dalan provizóriu ne’e la loos ka Hoax (Lia-bosok).
“Hakarak informa ba públiku katak, informasaun ne’ebé espalla iha mídia sosiál sira iha facebook kona-ba atu taka dalan provizóriu iha kapitál Dili laran ne’e informasaun laloos,” Superientendente Xefe Komandante PNTL Munsípiu Dili, Orlando Gomes, klarifika liuhusi jornalista TATOLI iha altar santu Tasi-tolu, Dili, ohin.
“Ita lataka dalan, foin daudaun ne’e ita só taka de’it ba iha parte Lesidere nian, tanba iha prosesu venerasaun, maibé iha parte selu-seluk lataka dalan” Superientendente ne’e reforsa.
Komandante ne’e informa, aban PNTL sei la taka dalan maibé asegura sarani sira ne’ebé sei partisipa misa iha Tasi-tolu.
“Ida-ne’e mak tuir ita-nia planu seguransa ne’ebé mak iha. Ita tenke koloka membru sira iha fatin sira-ne’ebé maka ita konsidera hanesan fatin risku hodi asegura ita-nia selebrasaun misa iha Tasi-Tolu ne’e la’o ho di’ak,” nia garante.
“Sarani sira ita haruka sira mai no sira-ne’ebé lori transporte sei ba para hotu iha tasi-ibun pertense Tasi-tolu nian maibé kuandu área iha Tasi-tolu nakonu hotu ona, ita sei orienta sira ba para iha área portu Tibar no Pelikan Paradise Tibar”, autoridade ne’e akresenta.
Superientendente Xefe Komandante PNTL, Munsípiu Dili, Orlando Gomes, apela katak atu loron aban komunidade sira tuir atividade misa ho di’ak nune’e husu ba komunidade sira, inklui joven sira hotu atu kontribui hamutuk hodi kria situasaun ne’ebé seguru ba selebrasaun misa la’o ho di’ak.
“Husi Munisípiu parte oeste ninian (Ermera, Likísa, Bobonaru), sira ne’ebé halo movimentu mai Dili, ita sei orienta sira para hotu iha Pelikan Paradise Tibar, hafoin mai tuir misa no misa ramata foin loke dalan ba diresaun oeste, atu nune’e ita bele kontrola movimentu transporte sira, inklui ema hotu husi inísiu to’o ramata”, nia dehan.
Autoridade seguransa ne’e konsidera katak informasaun falsu sira-ne’e, dalaruma ho situasaun hanesan ne’e, ita-nia sidadaun sira bele halo provokasaun no halo pániku ba sidadaunn sira maibé PNTL la dukur. Katak, nafatin alerta durante 24 oras hodi halo prevensaun ba situasaun.
“Maibé bainhira parte PNTL identifika ema sira-ne’ebé gosta fó sai informasaun laloos, normalmente, ita sei halo identifikasaun ba motivu husi asaun ne’ebé nia halo”, nia afirma.
Jornalista: Alexandra da Costa
Editór: Rafael Ximenes A. Belo
