DILI, 25 Abríl 2025 (TATOLI) – Ministru Transporte no Komunikasaun, Miguel Manetelu, husu empreza Carisma ne’ebé toma konta ba konstrusaun ba parajen públiku 10 iha Dili atu finaliza uluk parte balun hodi hatudu ba públiku rezultadu no modelu parajen ne’e rasik.
Nia esplika katak daudaun nia parte orienta ona Diresaun Nasionál Transporte Terrestre (DNTT) atu haree asuntu ne’e, tanba halte ne’e rasik mós hetan krítika maka’as husi públiku.
“Ha’u orienta ona ba diresaun ne’ebé toma konta ba asuntu ne’e hodi ko’alia ho kompañia, pelumenus foku uluk ida halo hotu ba. Ema haree katak halte ne’e hotu nia modelu mak ne’e. La’e ema haree ita taka kalen bosok no besi oan ruma katak halte mak ne’e ona”, ministru hateten iha Palásiu Governu, ohin.
Nia haktuir katak fatin ne’ebé daudaun empreza atu foka uluk hodi finaliza mak iha Kaikoli, Kuartel Jerál Polísia Nasionál Timor-Leste (PNTL) nia oin ka Universidade Nasionál Timor Lorosa’e (UNTL) nia kotuk.
“Ita espera ne’ebá hotu uluk mak kontinua fali ba fatin sira seluk. Labele koko finaliza iha tempu hanesan, maibé finaliza balun, la’e ema hanoin tau de’it kalen, tanba dalaruma prosesu la’o hela, maibé politikamente ema uza sasán ne’e halo akuzasaun iha mídia sosiál”, nia dehan.
Iha sorin seluk, Xefe Departamentu Sekretariadu Apoiu Tékniku Administrasaun DNTT, Nélson Sequeira Martins, hateten daudaun sira-nia parte orienta ona empreza Carisma atu finaliza uluk mak halte iha Kaikoli.
“Ita orienta ona empreza tenke finaliza uluk iha Kaikoli ne’e para ministru atu avalia rezultadu husi halte ne’e rasik. Loloos ne’e finaliza iha fulan ne’e, maibé seidauk entaun ita fó deadline to’o Maiu mak sira la finaliza halte ne’e, osan filafali ba kofre Estadu, selu nia tuir porsentu ne’ebé nia halo ona ne’e, maibé agora ita haka’as hela sira atu finaliza”, Nélson hateten.
Relasiona ho asuntu ne’e, jornalista tenta atu entrevista ho Diretór Empreza Carsima Unipessol, Lda, maibé seidauk fó resposta.
Lembra katak, iha 2024, MTK kontrata empreza Carisma ho montante $96.956 hodi konstrui parajen públiku hamutuk 10.
Fatin harii parajen públiku ne’e estabelese iha estrada protokolu sira hanesan iha Comoro, Timor Plaza, Ai-mutin, Bairru Pité, Villa Verde gruta nian, edifísiu Ministériu Solidaridade Sosiál no Inkluzaun (MSSI) nia oin, Matadouru iha eskola UNAMET nia oin, Villa Verde iha igreja Katedrál nia sorin, Kaikoli iha Kuartél Jerál PNTL nia oin iha Diresaun Nasionál Transporte Terrestre (DNTT) Balide nian.
Maibé, iha parte Timor Plaza nia oin ekipa Sekretaria Estadu Asuntu Toponímia no Organizasaun Urbana (SEATOU) sobu tiha no daudaun parte MTK no Ministériu Administrasaun Estatál sei koordena hodi buka soluasaun.
Notísia relevante : https://tatoli.tl/2025/01/21/konstrusaun-ba-parajen-transporte-publiku-finaliza-iha-abril/
Jornalista: Arminda Fonseca
Editora: Maria Auxiliadora
