OEKUSI, 25 Abríl 2025 (TATOLI) – Natar sira iha suku Cunha, sub-rejiaun Pante Makasar, Rejiaun Administrativa Espesiál Oekusi Ambeno (RAEOA) presiza konstrui iriigasaun hodi fornese bee no harii gabiaun, tanba daudaun ameasadu husi korrente mota nian.
Xefe Suku Cunha, Domingos Seco Caunan, hato’o problema ne’e tanba natar sira iha aldeia Sonamnasi no Noafafo inklui Maunaebeno no fatin seluk tan laiha irrigasaun no gabiaun atu proteje natar sira ne’e.
“Área Cunha iha natar barak, maibé iha balun hetan ameasa husi korrente mota, tanba natar balun seidauk konstrui gabiaun no balun mota sobu tiha, nune’e estraga agrikultór sira-nia natar no to’os. Hanesan natar sira iha área Nunuheno, iha aldeia Sonamnasi no Kiupanaf ho aldeia Maunaebeno”, autoridade lokál ne’e hateten iha suku Cunha, ohin.
Notísia relevante: Agrikultura Oé-Cusse planeia konstrui no reabilita irrigasaun 25
Nia salienta katak iha mós natar balun ne’ebé abandona, tanba laiha irrigasaun no kada tinan mota tun estraga tiha bee-dalan ne’ebé komunidade ho inisiativa kee rasik. “Tanba ne’e, presiza Governu tau-matan hodi harii mós irrigasaun”, nia rekomenda.
Notísia relevante: Autoridade RAEOA lansa kuda hare membramo ektare 15 iha Pante Makasar
Diretór Agrikultura Oekusi, Amaro Efi, hateten iha natar balun konsege rezolve ona iha tinan kotuk, no tinan ne’e sei harii tan irrigasaun 13.
“Ita iha planu atu kontinua, liuliu [harii] barrajen Tono nian. Aleinde ita halo irrigasaun foun, ita mós halo ona manutensaun ba irrigasaun balun, ne’ebé hetan estragu husi korrente mota no rai-halai. Iha tinan ne’e, ita sei halo irrigasaun foun 13, nune’e bele kanaliza ba natar sira iha Sonamnasi ho Nunuheno, maibé ita mós iha planu atu haree mós ba natar sira ne’ebé seidauk iha irrigasaun permanente, tenke konstrui pakote kedan ho gabiaun”, nia promete.
Notísia relevante: Barajen Tono benefísia natar ektare 1.717 iha Pante Makasar
Jornalista: Abílio Elo Nini
Editora: Maria Auxiliadora
