OÉ-CUSSE, 30 Outubru 2024 (TATOLI) – Sekretaria Rejionál ba Asuntu Agrikultura, Pekuária, Peska no Floresta Rejiaun Administrativa Espesiál Oé-Cusse Ambeno (RAEOA) tau iha planu tinan oin atu halo reabilitasaun no konstrusaun ba irrigasaun hamutuk 25.
“Iha planu asaun anuál, ita mós tau osan atu halo irrigasaun hamutuk 25 iha tinan oin. Balun halo reabilitasaun no balun halo konstrusaun foun”, Sekretária Rejionál ba Asuntu Agrikultura, Pekuária, Peska no Floresta, Filomena Sila, informa iha Oé-Cusse
Nune’e, nia espera Orsamentu Jerál Estadu (OJE) 2025 nian bele pasa iha sesaun debate iha Parlamentu Nasionál, tanba obra hirak-ne’e nesesáriu ba agrikultór sira.
Notísia relevante: RAEOA prevee millaun $62 iha OJE 2025
“Ita espera katak bele liu, tanba ida-ne’e la’ós ami mak hakarak tau ba planu ne’e, maibé natar-na’in sira mak persiza duni atu hadia’a irigasaun, tanba ekipa téknika sira tuun rasik observa iha kada natar sira, iha irigasaun ne’ebé iha no halo iha tinan hirak ba kotuk komesa aat fali ona, entaun persiza hadi’a no balun konstrui foun”, nia salienta.
Filomena Sila informa katak irrigasaun 25 ne’e maioria iha sub-rejiaun Pante Makasar ne’ebé fornese bee ba natar sira iha suku Lalisuk, Lifau, Cunha no balun iha sub-rejiaun seluk.
“Foin daudaun ami halo observasaun ba natar sira kuaze ektare 20 mak abandona tinan lima, balun tinan tolu la halai natar. Ne’e mak ha’u-nia tékniku sira haree ba ida-ne’e, ita tau duni osan atu hadi’a irigasaun no konstrui foun”, nia relata.
Notísia relevante: Autoridade RAEOA loke konkursu públiku reabilita barrajen Tono
Iha proposta OJE 2025 ba RAEOA aloka orsamentu ba kategoria kapitál no dezenvolvimentu hamutuk $13,032.195 ka okupa 49.78% ho objetivu atu finansia ba projetu multianuál hamutuk rua no projetu foun 39.
Jornalista: Abílio Elo Nini
Editora: Maria Auxiliadora
